تازہ ترین

امیرمحمدخان کو گورنر بلوچستان بنانےکی خبرمیں صداقت نہیں‘ ترجمان وزیراعظم

اسلام آباد : وزیراعظم عمران خان کے ترجمان کا کہنا ہے ڈاکٹرامیرمحمد خان جوگیزئی کو گورنر بلوچستان بنانے کی خبرمیں صداقت نہیں ہے۔

تفصیلات کے مطابق ترجمان وزیراعظم نے ڈاکٹرامیرمحمد خان جوگیزئی کو گورنر بلوچستان بنانے کی خبرکی تردید کردی۔

ترجمان وزیراعظم کا کہنا ہے کہ امیرمحمد خان جوگیزئی کو گورنرکا عہدہ دینا محض ایک تجویز تھی، حتمی فیصلہ نہیں کیا۔

انہوں نے مزید کہا کہ ڈاکٹرامیرمحمد خان جوگیزئی سے متعلق آنے والے شواہد کی بنا پر تجویز پر پیشرفت نہیں ہوئی۔

گورنرکا عہدہ قبول کرنے سے معذرت نہیں کی ‘ امیر محمد خان جوگیزئی

خیال رہے کہ اس سے قبل ڈاکٹرامیرمحمد خان جوگیزئی نے اے آروائی نیوز سے گفتگو کرتے ہوئے کہا تھا کہ گورنر کا عہدہ قبول کرنے سے معذرت نہیں کی، میرے بیان کو غلط انداز میں پیش کیا گیا۔

نامزد گورنر بلوچستان کا کہنا تھا کہ میں نے اپنے بیان میں نیب کی جانب سے کلیئرنس ملنے تک انتظار کرنے کا کہا تھا۔

ڈاکٹرامیرمحمد خان جوگیزئی کا کہنا تھا کہ نیب کی طرف سے وضاحت آنے تک حلف ملتوی کرنے کی بات کی تھی، حلف نیب کی جانب سے وضاحت آنے پراٹھاؤں گا۔

نامزد گورنر بلوچستان امیر محمد خان جوگیزئی کی عہدہ قبول کرنے سے معذرت

یاد رہے کہ گزشتہ روزامیرمحمد خان جوگیزئی کا ایک ویڈیو بیان منظرعام پرآیا تھا جس میں ان کا کہنا تھا کہ میں ایک بڑا سیاسی پس منظر رکھنے والا شخص ہوں، میرے بھائی، بھتیجے سب گورنر اور وزرا رہ چکے ہیں، لہٰذا میں نہیں چاہتا کہ میری وجہ سے پارٹی یا کسی کے اوپر کوئی حرف آئے ۔

انہوں نے ویڈیو پیغام میں مزید کہا تھا کہ وزیراعظم عمران خان کی جانب سے اعتماد کرنے پر ان کا شکریہ ادا کرتا ہوں، ان کا احترام میرے لیے ہرچیز سے بالاتر ہے، تاہم میرے لیے اس عہدے کی کوئی اہمیت نہیں۔

ڈاکٹر امیر محمد خان جوگیزئی کا کہنا تھا کہ مجھ پرکسی قسم کا کوئی کیس یا کوئی ایف آئی آر نہیں ہے، جس کیس کی بات ہورہی ہے وہ 2005ء کا ہے۔

Comments

- Advertisement -