The news is by your side.

Advertisement

پاکستان کو اسلامی فلاحی ریاست بنانا ہمارا خواب ہے، وزیراعظم

اسلام آباد: وزیراعظم عمران خان کا کہنا ہے کہ پاکستان کو اسلامی فلاحی ریاست بنانا ہمارا خواب ہے ، ہر خاندان کو ہیلتھ انشورنس سے 10 لاکھ روپے ملیں گے، غریب کوعلاج کے لیے سہولت دینے سے بڑی خدمت نہیں ہوسکتی۔

تفصیلات کے مطابق خیبر پختونخواہ میں ہر خاندان کو صحت کارڈ کے پروگرام کے اجرا کے حوالے سے کےپی حکومت اوراسٹیٹ لائف کے درمیان معاہدے کی تقریب ہوئی ، وزیراعظم عمران خان نے تقریب میں بطورمہمان خصوصی شرکت کی.

وزیراعظم عمران خان نے تقریب سے خطاب کرتے ہوئے کہا کے پی حکومت کومبارکبادپیش کرناچاہتاہوں ، آپ نےکے پی میں ہر ایک کو صحت کارڈ دینے کا فیصلہ کیا، آپ کو جتنی مبارکباد دوں وہ کم ہے۔

عمران خان کا کہنا تھا کہ ہر خاندان کو ہیلتھ انشورنس سے 10 لاکھ روپے ملیں گے، غریب کوعلاج کے لیے سہولت دینے سے بڑی خدمت نہیں ہوسکتی، ایک غریب خاندان علاج کے لیے اپنا سب کچھ لگا دیتا ہے، اس سوچ کی وجہ سے ہی میں شوکت خانم اسپتال بنایا۔

انھوں نے مزید کہا کہ کوویڈ کے باوجود ہم ہدف کے مطابق وصولی نہیں کرسکے، اس مشکل کے باوجود صحت کارڈ کا اجرا بڑا اقدام ہے، آپ کے اقدام سے دوسرے صوبوں کوبھی تحریک ملے گی۔

وزیراعظم کا کہنا تھا کہ پنجاب حکومت پر زور دوں گا کہ اس طرح کا پروگرام لائیں، پروگرام سے اسپتالوں میں مقابل بڑھے گا، سرکاری اسپتالوں پر اپنی کارکردگی بہتر کرنے کا دباؤ بڑھے گا۔

عمران خان نے مزید کہا کہ پروگرام ہیلتھ سیکٹرمیں بہتری کی بھی بنیادہے، ایجوکیشن انسٹیٹیوٹ ،اسپتال کے لئے کم قیمت پرزمین دیں گے، ہیلتھ کارڈ کی وجہ سے چھوٹے شہروں میں بھی اسپتال کھلیں گے، ہیلتھ کارڈ کی بدولت سب کو صحت کی سہولتیں فراہم ہوں گی۔

ان کا کہنا تھا کہ ہیلتھ کارڈ کے ذریعے صحت سےمتعلق شہریوں کا ڈیٹا بیس بھی بنے گا اور اسپتالوں کی کارکردگی کی بھی جانچ ہوسکےگی، پاکستان کو اسلامی فلاحی ریاست بنانا ہمارا خواب ہے ، ہم پاکستان بنانےوالوں کے اصولوں کےراستے پر جارہے ہیں۔

وزیراعظم نے کہا کہ معاشرہ انسانیت کیلئے نظام بنانے کا فیصلہ کرتا ہے تو اللہ کی نعمت بھی آتی ہے، مدینہ کی ریاست ماڈل ہے، جس پر چلنے والے ہر ایک کو اللہ نوازے گا ، جب غریبوں کیلئے کام کیاجاتاہے تو اللہ بھی برکت عطافرماتا ہے۔

Comments

یہ بھی پڑھیں