اسلام آباد : وزیراعظم عمران خان نے تحریک انصاف کے ارکان قومی اسمبلی پر اسلام آباد چھوڑنے پر پابندی لگادی اور تمام ارکان کو اجلاس میں حاضری یقینی بنانے کی ہدایت کردی۔
تفصیلات کے مطابق وزیراعظم عمران خان نے اعتماد کا ووٹ لینے کے معاملے پر تمام ارکان قومی اسمبلی کو اسلام آباد سے باہر جانے سے روک دیا اور اہم ہدایات جاری کر دیں۔
عمران خان نے ہدایت دی کہ تمام ارکان اسلام آباد میں رہیں اور آئندہ اجلاس میں حاضری یقینی بنائیں، ذرائع کا کہنا ہے کہ تمام پی ٹی آئی ارکان کو وزیراعظم کا پیغام پہنچا دیا گیا ہے۔
خیال رہے سینیٹ الیکشن میں قومی اسمبلی سے عبدالحفیظ شیخ کی شکست کے بعد وزیراعظم قومی اسمبلی سے اعتماد کا ووٹ لیں گے، اس سلسلے میں قومی اسمبلی کاخصوصی اجلاس ہفتے کو طلب کرلیاگیا ہے۔
وزیراعظم عمران خان آج شام ساڑھے سات بجے قوم سے خطاب کریں گے جبکہ صادق سنجرانی کو چیئرمین سینیٹ کیلیے نامزد بھی کردیا گیا ہے۔
گذشتہ روز اسلام آباد میں سینیٹ نشست ہارنے کے بعد حکومت نے قومی اسمبلی کا اجلاس طلب کرنے اور وزیر اعظم عمران خان نے ایوان سے اعتماد کا ووٹ لینے کا فیصلہ کیا تھا۔