The news is by your side.

Advertisement

وزیراعظم عمران خان نے ٹائیگر فورس پر پارٹی ارکان کو گائیڈ لائنز فراہم کردیں

اتحاد اور ڈسپلن کیساتھ کورونا وائرس کا کامیابی سے مقابلہ کریں گے

اسلام آباد : وزیراعظم عمران خان نے ٹائیگر فورس پرپارٹی ارکان کوگائیڈ لائنز فراہم کر تے ہوئے فورس کوحلقوں میں متحرک کرنےکی ہدایت کردی اور کہا   اتحاد اور ڈسپلن کیساتھ کورونا وائرس کا کامیابی سے مقابلہ کریں گے۔

تفصیلات کے مطابق وزیراعظم کی زیر صدارت پی ٹی آئی پارلیمانی پارٹی کا اہم اجلاس ہوا، پی ٹی آئی کے ارکان قومی و صوبائی اسمبلی اجلاس میں شریک ہوئے جبکہ صوبائی وزرائے اعلی سمیت وفاقی وزرانےبھی ویڈیو لنک سےشرکت کی۔

اجلاس میں کورونا صورتحال،حکومتی اقدامات اورمرض سےمتعلق خدشات پر بات چیت کی گئی اور ارکان اسمبلی نے حلقوں میں کورونا کی صورتحال پر وزیر اعظم کو بریفنگ دی جبکہ معاون خصوصی عثمان ڈار نے بھی خصوصی بریفنگ دی۔

وزیراعظم نے پارٹی رہنماؤں کو ٹائیگر فورس پر گائیڈ لائنز فراہم کرتے ہوئے فورس کوحلقوں میں متحرک کرنے کی ہدایت کردی اور سیالکوٹ ٹیسٹ رن کی طرز کے فارمولے کی منظوری دے دی۔

اجلاس میں فیصلہ کیا گیا کہ نوجوانوں سےخصوصی خطاب کےفوری بعدٹائیگرفورس آپریشنل ہوگی اور صوبائی سطح پر اعلی بیوروکریسی اور انتظامیہ معاونت کرے گی۔

وزیراعظم عمران خان نے پارلیمانی پارٹی اجلاس سے خطاب کرتے ہوئے کہا کہ عوامی نمائندوں کیلئےعوام کی خدمت کا بہترین موقع ہے، موجودہ وقت سارے اختلافات بھلاکر قوم کی خدمت کا تقاضا کرتا ہے۔

عمران خان کا کہنا تھا کہ پیٹرولیم مصنوعات قیمتوں میں کمی کےثمرات عوام تک پہنچانےہیں، ارکان اسمبلی انتظامیہ کیساتھ ملکرقیمتوں پرنظر رکھیں اور کورونا کے اثرات سےنمٹنے کیلئے نوجوانوں کومتحرک کریں۔

انھوں نے کہا کہ حکومتی گائیڈلائنزپرعملدرآمدکرانےمیں انتظامیہ سےملکر کام کریں، ارکان اسمبلی حلقوں میں اپنی ٹیمیں بناکر مستحق افراد تک پہنچیں، حکومت ہر طبقے کو ریلیف فراہم کرنے کے اقدامات کررہی ہے،ارکان اسمبلی مساجدمیں ایس او پیز پر عملدرآمد میں بھی کرداراداکریں۔

وزیراعظم کا کہنا تھا کہ موجودہ صورتحال میں ایک ٹیم بن کرکام کرناہوگا، مجھے معلوم ہے ہر کوئی اپنی استعدادمیں کام کررہا ہے، اتحاد اور ڈسپلن کیساتھ کورونا وائرس کا کامیابی سے مقابلہ کریں گے۔

Comments

یہ بھی پڑھیں