اسلام آباد : وزیراعظم عمران خان نے منحرف ارکان کو راضی کرنے کا ٹاسک پرویز خٹک اور شاہ محمود قریشی کو دے دیا جبکہ لاپتہ ارکان کا پتہ لگانے کیلئے پارلیمانی پارٹی کا اجلاس بلانے کی تجویز دی گئی۔
تفصیلات کے مطابق وزیراعظم عمران خان کی زیر صدارت سیاسی کمیٹی کا اجلاس ہوا ، جس میں اسپیکر قومی اسمبلی اسدقیصر، اٹارنی جنرل ، وفاقی وزرا پرویز خٹک، اسد عمر، فواد چوہدری، شفقت محمود شریک ہوئے۔
اجلاس میں قانونی ٹیم نے تحریک عدم اعتماد اور قانونی پیچیدگیوں پر بریفنگ دی اور منحرف ارکان سےمتعلق بھی تفصیلی بات چیت کی گئی۔
ذرائع کے مطابق اجلاس میں وزیراعظم عمران خان نے کہا اتحادی ہمارے ساتھ ہیں ، منحرف ارکان کو راضی کر لیں گے، اپوزیشن کو تحریک عدم اعتماد پر ناکامی سے دوچار ہونا پڑے گا۔
ذرائع کا کہنا تھا کہ شرکا نے وزیراعظم عمران خان کو اتحادیوں سے ملاقاتوں کا مشورہ دیا، وزیراعظم نے کہا اتحادیوں سےملاقاتیں کی ہیں اور مزید بھی ہوں گی۔
اجلاس میں قومی اسمبلی کا اجلاس 21 مارچ کو بلانے پر اتفاق کیا گیا اور قانونی ٹیم نے قومی اسمبلی اجلاس بلانے سے متعلق بریفنگ دی۔
ذرائع کے مطابق کمیٹی ارکان نے حتمی فیصلے کا اختیار وزیراعظم کو دے دیا اور شرکا نے پارلیمانی پارٹی کا اجلاس بلانے کی تجویز دی، پارلیمانی پارٹی اجلاس بلا کر ارکان کی حاضری کا پتہ چل جائے گا۔
لاپتہ ارکان کا پتہ لگانے کیلئے پارلیمانی پارٹی کا اجلاس بلانے کی تجویز
اجلاس میں شرکا نے کہا کچھ ارکان کی مسنگ کاپتہ چلا ہے، نام سامنے آ جائیں گے۔
وزیراعظم نے منحرف ارکان کوراضی کرنے کا ٹاسک پرویز خٹک،شاہ محمود کو دے دیا اور کہا کون سے ارکان ممکنہ طور پر کسٹڈی میں ہو سکتے ہیں، تفصیل لینے کی ہدایت کردی۔
