اسلام آباد : وزیراعظم عمران خان نے سانحہ مری کے متاثرین سے اظہار ہمدردی کرتے ہوئے کہا کمیٹی جلد از جلد سانحہ کے حقائق سامنے لائے۔
تفصیلات کے مطابق وزیراعظم عمران خان کی زیر صدارت ترجمانوں کا اجلاس ہوا ، جس میں مشیر پارلیمانی امور بابر اعوان اور وزیر مملکت فرخ حبیب کی طرف سے فارن فنڈنگ کیس پر بریفنگ دی گئی۔
مشیر پارلیمانی امور بابر اعوان نے بریفنگ دیتے ہوئے کہا 74سال میں پی ٹی آئی پہلی جماعت ہے جس نےفنڈنگ ذرئع بتائے، ہم نے اپنے ڈونرز کی تفصیلات الیکشن کمیشن کو فراہم کیں، الیکشن کمیشن دوسری جماعتوں کےفنڈنگ ذرائع بھی سامنے لائے۔
بابراعوان کا کہنا تھا کہ ہم نے تاریخ رقم کی ہے اور یہ ہماری فتح ہے، وزیراعظم کو بتایا مالیاتی بل اسی ہفتےاسمبلی میں لائیں گے۔
پنجاب حکومت کےترجمان حسان خاورنے سانحہ مری پر بریفنگ دی، جس پر وزیراعظم عمران خان نے متاثرین سے اظہار ہمدردی کرتے ہوئے کہا سانحہ مری پر بہت دکھ ہوا، کمیٹی جلد از جلد سانحہ مری کے حقائق سامنے لائے۔
عمران خان کا کہنا تھا کہ ساری چیزوں کوریگولیٹ کرنے کی ضرورت ہے، مری میں رہائش کی کمی کو دور کرنے پر زور دیا جائے اور جدید طریقے سے سارے معاملے کو ہینڈل کیا جائے۔
اجلاس کے دوران وزیرخزانہ شوکت ترین نے معاشی صورتحال پر بھی بریفنگ دی۔
