ناران: وزیر اعظم عمران خان کا کہنا ہے کہ ماضی میں جنگلات اور درختوں کی تباہی کی گئی، سیاحت سے علاقوں میں پیسہ آئے گا اور روزگار کے مواقع ملیں گے۔
تفصیلات کے مطابق وزیر اعظم عمران خان نے ناران میں ٹائیگر فورس سے خطاب کیا، اپنے خطاب میں ان کا کہنا تھا کہ علاقے کا فضائی جائزہ لے کر خوشی ہوئی، بہت زیادہ درخت اگائے گئے، ہماری آنے والی نسلیں ہماری شکر گزار ہوں گی کہ ہم نے ان کی پرواہ کی۔
وزیر اعظم کا کہنا تھا کہ ماضی میں جنگلات اور درختوں کی تباہی کی گئی، ناران کے لیے پروگرام شروع ہوگیا تو بہت اچھا ہوگا، جو خوبصورتی پاکستان میں ہے شاید ہی دنیا میں کہیں ہو۔
انہوں نے کہا کہ ہمیں چاہیئے کہ اللہ کی دی گئی نعمتوں کاخیال رکھیں، جتنے بھی گارڈز اور رضا کار چنے ہیں وہ مقامی ہی ہیں۔ مقامی رضا کار جانتے ہیں کہ کون درخت کاٹتا ہے، مقامی رضا کار بہتر انداز سے درختوں کی حفاظت کر سکتے ہیں۔
وزیر اعظم کا کہنا تھا کہ صفائی کی بہت اہمیت ہے، ٹور ازم سے علاقوں میں پیسہ آئے گا، روزگار کے مواقع ملیں گے۔ سوئٹزر لینڈ ہمارے ناردرن ایریاز کا نصف ہے۔ سوئٹزر لینڈ سیاحت میں پاکستان کے ناردرن ایریاز کا مقابلہ نہیں کر سکتا، ہم نے اپنے سیاحتی مقامات کا خیال رکھنا ہے۔
