انقرہ: وزیراعظم عمران خان نے کہا ہے کہ پاکستان اور ترقی کے درمیان دو طرفہ تجارت کا فروغ ضروری ہے، دونوں ملکوں کے درمیان تجارت کا حجم بڑھانے کی ضرورت ہے۔
تفصیلات کے مطابق وزیراعظم عمران خان نے ترکی کے تاجروں اور صنعت کاروں سے خطاب کرتے ہوئے کہا کہ پاکستان میں سرمایہ کاری کے وسیع مواقع ہیں، پاکستان اور ترقی کے درمیان دو طرفہ تجارت کا فروغ ضروری ہے، ترکی کی تحریک آزادی میں بھی پاکستان کے لوگوں کا بڑا کردار ہے۔
وزیراعظم نے کہا کہ پاکستان میں سی پیک منصوبے سے زبردست تجارتی سرگرمیاں ہوں گی، پاکستان کی آبادی میں 12 کروڑ نوجوان ہیں، ملک میں گورننس کی بہتری پر بھرپور توجہ دے رہے ہیں۔
عمران خان نے کہا کہ سرمایہ کاروں کے لیے سازگار ماحول کے لیے اقدامات کررہے ہیں، غیرملکی سرمایہ کاروں کے لیے کاروبار آسان بنانے کی کوشش کررہے ہیں، تیل، گیس، معدنیات کے شعبوں میں مواقع تلاش کرنے کی ضرورت ہے۔
وزیراعظم نے کہا کہ پاکستان میں آئندہ پانچ سال میں 50 لاکھ گھر تعمیر کیے جائیں گے، پاکستان میں سیاحت کے شعبے میں بے پناہ مواقع ہیں، دنیا کی بلند ترین چوٹیوں میں سے نصف پاکستان میں ہیں، سیاحت کے فروغ کے لیے توجہ دے رہے ہیں۔
مزید پڑھیں: وزیراعظم عمران خان اعلیٰ سطح وفدکےہمراہ ترکی پہنچ گئے
انہوں نے کہا کہ ہم چین کی مدد سے خصوصی اقتصادی زونز قائم کررہے ہیں، پاکستان میں مذہبی سیاحت کے بھی بے پناہ مواقع موجود ہیں۔
مولانا جلال الدین رومی کے مزار پر حاضری
قبل ازیں وزیراعظم عمران خان نے وفد کے ہمراہ مولانا جلال الدین رومی کے مزار پر حاضری دی، وزیراعظم نے مزار پر پھول چڑھائے اور فاتحہ خوانی کی۔
عمران خان کا کہنا تھا کہ مولانا جلال الدین رومی کا شمار عظیم صوفی بزرگوں میں ہوتا ہے، جلال الدین رومی کی صوفیانہ تصنیفات روحانی موضوعات پر شاہکار ہیں۔
ان کا کہنا تھا کہ مولانا روم علامہ اقبال کے روحانی پیشوا تھے، ترکی کے ساتھ تاریخی، تہذیبی، ثقافتی تعلقات صدیوں پر محیط ہیں۔
