اسلام آباد: وزیراعظم عمران خان نے کہا ہے کہ ماضی کی کرپشن نے کاروباری طبقوں کے لیے مسائل پیدا کیے ہیں، سرمایہ کاروں کی حوصلہ افزائی اور ہر ممکن سہولت فراہم کرنا حکومت کی ترجیح ہے۔
تفصیلات کے مطابق وزیراعظم کی زیر صدارت بورڈ آف انویسٹمنٹ کے بورڈ آف ڈائریکٹرز کا اجلاس ہوا، جس میں وزیر توانائی عمر ایوب، مشیر خزانہ عبدالحفیظ شیخ، مشیر تجارت رزاق داؤد، چیئرمین بورڈ آف انویسٹمنٹ زبیر گیلانی، ڈاکٹر سلمان شاہ، ڈاکٹر شمشاد اختر، احمر بلال صوفی ودیگر نے شرکت کی۔
اجلاس میں مختلف شعبوں میں سرمایہ کاری کے فروغ، کاروبار کی راہ میں رکاوٹوں کو دور کرنے پر غور کیا گیا، اسپیشل اکنامک زونز کے قیام، صنعت سے وابستہ افراد کو سہولتیں دینے پر بھی غور کیا گیا۔
وفاقی و صوبائی سطح پر بورڈ آف انویسٹمنٹ کے اقدامات اور مستقبل کے لائحہ عمل پر گفتگو کی گئی، نئی اسٹرٹیجی برائے 2020-2024 کا پہلا تجویز کردہ مسودہ وزیراعظم کو پیش کیا گیا، بورڈ اراکین کی تجاویز کے مطابق مسودے کو حتمی شکل دی جائے گی۔
وزیرِاعظم عمران خان کی زیرصدارت بورڈ آف انویسٹمنٹ کے بورڈ آف ڈائریکٹرز کا اجلاس
اجلاس میں وزیرِ توانائی عمر ایوب خان، مشیر خزانہ ڈاکٹر عبدالحفیظ شیخ، مشیر تجارت عبدالرزاق داؤد، چئیرمین بورڈ آف انویسٹمنٹ زبیر گیلانی، ڈاکٹر سلمان شاہ، ڈاکٹر شمشاد اختر، احمر بلال صوفی و دیگرشریک pic.twitter.com/NFzs3UOyiw— Tehreek-e-Insaf (@InsafPK) July 12, 2019
وزیراعظم عمران خان کو بریفنگ دی گئی کہ اسپیشل اقتصادی زونز قوانین کو کاروبار دوست بنانے کا جائزہ لیا جارہا ہے، کاروبار سے متعلق وفاقی، صوبائی قوانین کو ہم آہنگ و یکجا کرنے کا عمل شروع کردیا گیا ہے۔
وزیراعظم نے چیئرمین سرمایہ کاری بورڈ کو صوبائی، وفاقی قوانین یکجا کرنے اور قوانین کو ہم آہنگ اور مربوط بنانے کا عمل ایک ماہ میں مکمل کرنے کی ہدایت کی۔
عمران خان نے کہا کہ متعلقہ قوانین کو صوبوں کے اشتراق سے مزید آسان بنایا جائے گا، سرمایہ کاری بورڈ سفارشات کی روشنی میں غیرضروری شرائط کو ختم کیا جائے۔
