اسلام آباد: وزیر اعظم عمران خان نے پشاور میں مسجد کے اندر خودکش بم دھماکے کی شدید الفاظ میں مذمت کی ہے۔
سماجی رابطے کی ویب سائٹ ٹوئٹر پر وزیر اعظم عمران خان نے اپنے ایک بیان میں کہا کہ میری تعزیت متاثرین کے اہلخانہ کے ساتھ ہے، زخمیوں کی صحت یابی کے لیے دعاگو ہوں۔
وزیر اعظم نے کہا کہ خبیر پختون خوا کے وزیر اعلیٰ محمود خان کو ذاتی طور پر متاثرین کے اہل خانہ سے ملاقات کی کہہ دیا ہے، ذاتی طور پر آپریشنز کی نگرانی اور اداروں کے ساتھ رابطہ میں ہوں۔
My deepest condolences go to the victims' families & prayers for the recovery of the injured. I have asked CM KP to personally visit the families & look after their needs.
— Imran Khan (@ImranKhanPTI) March 4, 2022
عمران خان نے مزید کہا کہ ہمارے پاس تمام معلومات ہیں کہ دہشت گرد کہاں سے آئے، پوری طاقت کے ساتھ دہشت گردوں کا پیچھا کر رہے ہیں۔
خیال رہے کہ ملک دشمن عناصر نے آج مذموم کارروائی کرتے ہوئے پشاور کے معروف قصہ خوانی بازار کو خون میں نہلا دیا۔ قصہ خوانی بازار کی جامع مسجد میں خودکش بم دھماکے میں کم از کم بچوں سمیت 56 افراد شہید ہوگئے۔
دھماکے کے 194 زخمی مختلف اسپتالوں میں زیرِ علاج ہیں۔ ان میں سے بیشتر زخمیوں کی حالت تشویشناک ہے جس کے باعث خدشہ ہے کہ شہادتوں میں مزید اضافہ ہوسکتا ہے۔
دھماکا جامع مسجد کوچہ رسالدار میں اس وقت ہوا جب نمازی جمعے کی نماز کی ادائیگی میں مصروف تھے۔ دھماکے کے بعد مسجد میں افراتفری پھیل گئی اور ہر کوئی اپنے پیاروں کی تلاش میں مارا مارا پھرتا رہا۔