غازی بروتھا: وزیر اعظم عمران خان نے غازی بروتھا میں کسانوں کو خوش خبری سنائی ہے کہ فصلوں کا زیادہ فائدہ مڈل مین اٹھا رہے ہیں، اس سلسلے میں جلد ایک پروگرام لائیں گے۔
تفصیلات کے مطابق آج وزیر اعظم عمران خان نے غازی بروتھا کے دورے کے موقع پر کسانوں سےگفتگو کرتے ہوئے کہا کہ کاشت کار طبقے کی معاونت کے لیے منصوبہ بندی کر رہے ہیں، جس سے زرعی پیداوار بڑھے گی اور کاشت کار ترقی کریں گے۔
وزیر اعظم نے غازی بروتھا میں کسانوں کے مسائل بھی سنے، انھوں نے کہا جعلی زرعی ادویات کے خلاف کریک ڈاؤن کریں گے، کاشت کاروں کے مسائل حل کرنے کے لیے پر عزم ہیں، پٹرول کی قیمتیں بھی اس مرتبہ بڑھنے نہیں دیں، جو پروگرامز لے کر آ رہے ہیں اس سے کسانوں کو بھی فائدہ ہوگا۔
انھوں نے کہا کسان اشیا سستی بیچ رہا ہے اور شہر میں مہنگی مل رہی ہیں، درمیان میں فائدہ اٹھانے والوں کے لیے کوئی پروگرام ہونا چاہیے، حکومت کی جانب سے ایک پروگرام ہونا چاہیے کہ کسان کو درست قیمت ملے۔
وزیر اعظم کا کہنا تھا کسانوں اور مارکیٹ کے بیچ سب سے زیادہ مڈل مین کما رہا ہے، کسان سے جس ریٹ پر اجناس لی جاتی ہیں اس سے کہیں زیادہ مہنگی بیچی جاتی ہیں، ہم ایسا پروگرام لائیں گے جس سے کسانوں کو درست قیمت ملے۔