The news is by your side.

Advertisement

ملازمتوں کے مواقع سے متعلق خدشات جلد دور کریں گے، وزیراعظم عمران خان

اسلام آباد : وزیراعظم عمران خان نے کہا ہے کہ ملازمتوں کے مواقع سے متعلق پیدا ہونے والے جلد خدشات دور کریں گے، اسپیشل اکنامک زونز کے معاملے پر جنگی بنیادوں پر کام تیز کیا جائے۔

ان خیالات کا اظہار انہوں نے اجلاس سے خطاب کرتے ہوئے کیا۔ تفصیلات کے مطابق اسلام آباد میں وزیراعظم عمران خان کی زیر صدارت اعلیٰ سطح کا اجلاس منعقد ہوا، اجلاس میں ملک بھرمیں خصوصی اقتصادی زون کے قیام سے متعلق پیشرفت کا جائزہ لیا گیا۔

اس موقع پر وفاقی وزراء خسروبختیار، عمرایوب، مشیرتجارت رزاق داؤد، مشیر اطلاعات فردوس عاشق اعوان، معاون خصوصی ندیم بابر، چیئرمین بورڈ آف انویسٹمنٹ سمیت اعلیٰ حکام بھی موجود تھے۔

اجلاس میں غیرملکی اور مقامی سرمایہ کاروں کو دی گئی سہولیات کا جائزہ بھی لیا گیا، وزیر اعظم کو مرکز اور صوبوں کے درمیان مؤثر رابطوں اورحکمت عملی پر بریفنگ دی گئی اور اسپیشل اکنامک زونز کےتحت بجلی اور گیس کیلئے فنڈز اور پی سی ون کے حوالے سے بھی آگاہ کیا گیا۔

اس کے علاوہ سرمایہ کاروں کے ساتھ یکساں سلوک کیلئے بنائے گئے قانون سازی کے فریم ورک پر بریفنگ دیتے ہوئے بتایا گیا کہ67ممالک کے لئے ورک ویزا اور ویزا آن آرائیول کی سہولت دی گئی ہے۔

اجلاس سے خطاب کرتے ہوئے وزیراعظم عمران خان نے کہا کہ اسپیشل اکنامک زونز کے معاملے پر جنگی بنیادوں پر کام تیز کیا جائے، زمین کی دستیابی، ملازمتوں کے مواقع سے متعلق خدشات دورکریں گے۔

انہوں نے کہا کہ  ایس ایم ایز کے قیام کیلئے تمام اقدامات کی سربراہی وفاقی حکومت کرے گی، ایس ایم ایز کے قیام سے معیشت کا رخ بہتری کی جانب موڑنے میں مدد ملے گی۔

وزیراعظم کا مزید کہنا تھا کہ ٹیکنالوجی اور سرمایہ کاری بڑھانے کیلئے دیگر ممالک کی طرح اقدامات ضروری ہیں، حکومت تمام صوبوں کو مکمل طور پراعتماد میں لے گی۔

حکومت نے کاروبار میں آسانی کے لئے نمایاں اقدامات کئے ہیں، عوام کو ترقی سے متعلق زمینی حقائق سے آگاہ رکھنے کی ضرورت ہے۔

Comments

comments

یہ بھی پڑھیں