The news is by your side.

Advertisement

وزیر اعظم نے رات پشاور میں گزاری، صوبائی وزرا کے قلمدانوں میں رد و بدل کا امکان

پشاور: وزیر اعظم عمران خان پشاور پہنچ گئے، موسم کی خرابی کے باعث ان کے طیارے کو اسلام آباد کی بہ جائے پشاور اتارا گیا۔

تفصیلات کے مطابق وزیر اعظم عمران خان کل کراچی دورے پر آئے تھے، واپسی میں موسم کی خرابی کے باعث ان کے طیارے کو اسلام آباد کی بہ جائے پشاور ایئرپورٹ پر اتارا گیا، شاہ محمود قریشی، گورنر کے پی اور عثمان ڈار بھی ان کے ہم راہ تھے۔

وزیر اعظم عمران خان نے رات پشاور میں گزاری، ذرایع کا کہنا ہے کہ خیبر پختون خوا کابینہ کا آج خصوصی اجلاس بلا لیا گیا ہے، وزیر اعظم کے پی کابینہ کے خصوصی اجلاس کی صدارت خود کریں گے، اجلاس میں صوبائی وزرا کی کارکردگی کا جائزہ لیا جائے گا، وزرا کی کارکردگی کے مطابق قلم دانوں میں رد و بدل کا بھی امکان ہے۔

کراچی میں تاجر برادری سے وزیر اعظم عمران خان کی ملاقات

ذرایع کا کہنا ہے کہ وزیر اعظم کی جانب سے خیبر پختون خوا کابینہ میں توسیع کی منظوری متوقع ہے، وزیر اعظم اجلاس سے قبل گورنر اور وزرا سے علیحدہ علیحدہ ملاقاتیں بھی کریں گے۔

یاد رہے کہ گزشتہ روز کراچی میں تاجر برادری اور صنعت کاروں سے ملاقات کی، وزیر اعظم عمران خان نے کہا کہ معیشت کی بحالی، استحکام کے لیے اسٹیک ہولڈرز کو ساتھ چلنا ہوگا، ملک میں سرمایہ کاری آ رہی ہے، روزگار کے مواقع کھلنے والے ہیں، معاشی سرگرمیوں کا فروغ اور غربت کا خاتمہ حکومت کی اوّلین ترجیح ہے۔

وزیراعظم نے کہا کہ تاجر برادری معیشت کا اہم حصہ ہے، مل کر مسائل کا حل نکال لیں گے، صنعت کار اور تاجر حکومت سے مل کر معاشی عمل کو تیز کریں۔

Comments

یہ بھی پڑھیں