اسلام آباد : وزیراعظم عمران خان چین کے چار روزہ دورے پر روانہ ہوگئے ، دورے کے دوران وہ چینی صدر، وزیراعظم، تاجروں اور تھنک ٹینک سے ملاقاتیں کریں گے، جس میں سی پیک، تجارتی اوراقتصادی تعاون پر غور کیا جائے گا۔
تفصیلات کے مطابق وزیراعظم عمران خان اعلیٰ سطحی وفد کے ہمراہ 4 روزہ دورے پر چین روانہ ہوگئے ، وفد میں وزیر خارجہ ، وزیر خزانہ ، اسد عمر، فواد چوہدری، معید یوسف، مشیرِ تجارت عبدالرزاق داؤد اورمعاونِ خصوصی چین پاکستان اقتصادی راہداری خالد منصور شامل ہیں۔3
وزیرِ اعظم چین میں سرمائی اولمپکس کی افتتاحی تقریب میں شرکت کریں گے جبکہ چینی صدر اور چینی وزیراعظم سے اہم ملاقاتیں ہوں گی۔
وزیراعظم عمران خان کی چینی ہم منصب سے 5فروری اور چینی صدرکی6 فروری کوون آن ون ملاقات ہوگی جبکہ یواین سیکرٹری جنرل اور غیر ملکی سربراہان سے ملاقاتیں بھی شیڈول میں شامل ہیں۔
فواد چوہدری کا کہنا تھا کہ چینی صدر 2 سال بعد کسی عالمی رہنماسے ملاقات کریں گے ، جو عمران خان ہوں گے، ملاقاتوں میں سی پیک، تجارتی اوراقتصادی تعاون پر غور کیا جائے گا جبکہ متعددایم او یوز اور معاہدوں پر دستخط کیے جائیں گے۔
وزیراعظم کےدورہ چین کا مقصد سرمائی اولمپکس میں پاکستان کی نمائندگی اور افتتاحی تقریب میں پاکستان کاجذبہ خیرسگالی پہنچانا ہے۔
وزیراعظم کی چین کی مختلف کاروباری شخصیات اورسرمایہ کاروں سے بھی ملاقاتیں طے ہیں ، دورےکے بعد چین سے کئی کاروباری اور صنعتی یونٹس پاکستان منتقل ہوں گے۔
وزیراعظم کا دورہ ہمالیہ سے اونچے اور بحیرہ عرب سے گہرے پاک چین تعلقات کی وسعت میں مزید اضافہ کرے گا۔
