اسلام آباد: وزیراعظم عمران خان ایک روزہ دورے پر ایران پہنچ گئے، وزیراعظم کا دورہ خطے میں امن واستحکام کے فروغ کے اقدامات کا حصہ ہے۔
تفصیلات کے مطابق وزیراعظم عمران خان ایک روزہ دورے پر ایران پہنچ گئے، وزیرخارجہ شاہ محمود قریشی، معاون خصوصی زلفی بخاری وزیراعظم کے ہمراہ ہیں۔
ایران کے وزیرخارجہ جواد ظریف نے وزیراعظم عمران خان کا ایئرپورٹ پر استقبال کیا۔
وزیراعظم عمران خان تہران دورے میں ایرانی صدر حسن روحانی اور ایرانی سپریم لیڈر آیت اللہ خامنہ ای سے ملاقاتیں کریں گے۔
وزیراعظم ایرانی قیادت سے ملاقاتوں میں خلیج میں امن اور سیکیورٹی سے متعلق مسائل پر بات چیت کریں گے۔ وزیراعظم دو طرفہ معاملات اور مقبوضہ کشمیر سمیت خطے میں دیگر جغرافیائی وسیاسی تبدیلیوں سے متعلق بات چیت کریں گے۔
دوسری جانب ایران نے پاکستان کی ثالثی کوششوں کا خیرمقدم کرتے ہوئے کہا کہ سعودی عرب سے مذاکرات کے دروازے کھلے ہیں۔
خیال رہے کہ وزیراعظم عمران خان کا اس سال ایران کا یہ دوسرا دورہ ہے، وزیر اعظم کی جنرل اسمبلی اجلاس کے موقع پر بھی ایرانی صدر سے ملاقات ہوئی تھی۔
وزیراعظم عمران خان دورہ ایران سے واپسی کے بعد منگل کو سعودی عرب بھی جائیں گے۔
ایران کا وزیر اعظم عمران خان کی ثالثی کی کوشش کا خیرمقدم
وزیر خارجہ شاہ محمود قریشی نے گزشتہ روز اے آر وائی نیوز سے خصوصی گفتگو کرتے ہوئے کہا تھا کہ وزیر اعظم کا دورہ ایران اور ثالثی مشن آسان نہیں، ماضی میں بھی ثالثی کی کئی کوششیں ہو چکی ہیں۔
شاہ محمود قریشی کا کہنا تھا وزیر اعظم پاکستان امن کے لیے ایک کوشش کرنے جا رہے ہیں، تیل پیدا کرنے والی قوتوں میں لڑائی کا نتیجہ اچھا نہیں ہوگا۔
