کراچی : دفاعی نمائش آئیڈیاز2018 کی افتتاحی تقریب میں وزیر اعظم عمران خان کی شرکت کاامکان ہے، نمائش کی تیاریاں آخری مراحل میں پہنچ چکی ہے، 60ممالک کےدفاعی ماہرین بھی آئیڈیاز2018میں شریک ہوں گے۔
تفصیلات کے مطابق کراچی میں آئیڈیاز2018نمائش کی تیاریاں آخری مراحل میں داخل ہو گئی ہے ، افتتاحی تقریب کل ہوگی، آئیڈیاز کی افتتاحی تقریب میں وزیر اعظم عمران خان کی شرکت کا امکان ہے۔
آئیڈیازمیں 560سےزائد ملکی اورغیر ملکی اسلحہ سازکمپنیاں شرکت کررہی ہیں جبکہ 60ممالک کے دفاعی ماہرین بھی آئیڈیاز 2018میں شریک ہوں گے، روسی بحریہ کے 2 جہاز بھی آئیڈیاز 2018 میں شرکت کررہے ہیں۔
دفاعی نمائش دو ہزار اٹھارہ ستائیس سے تیس نومبر تک کراچی ایکسپو سینٹر میں جاری رہے گی۔
مزید پڑھیں : صدر مملکت عارف علوی دفاعی نمائش آئیڈیاز2018 کا کل افتتاح کریں گے
پاکستان میں تیار ہونے والے دفاعی سازو سامان کی دسویں بین الاقوامی نمائش آئیڈیاز دو ہزاراٹھارہ میں50سے زائد ممالک کے262سے زائد غیر ملکی وفود شرکت کر رہے ہیں، اس مرتبہ نمائش میں اسٹالز لگانے والوں کی تعداد ماضی کی آئیڈیاز سے زیادہ ہوگی۔
آئیڈیاز دو ہزار اٹھارہ میں مزید ممالک شرکت کر رہے ہیں، جن میں امریکہ،اٹلی،جرمنی،اردن،پولینڈ،روس،جنوبی کوریا،یوکرائن،عرب امارات اور دیگر شامل ہیں۔
ڈائریکٹر کورآڈنیشن ڈیپوبریگیڈیئروحید کے مطابق پاکستان کی ڈیفنس کی برآمد مسلسل بڑھ رہی ہے، برآمد تیس کروڑ ڈالر سے بھی تجاوز کرچکی ہے۔
خیال رہے عالمی سطح کی نمائش کا کراچی میں انعقاد شہریوں کیلئے بھی ایک اعزاز ہے۔
واضح رہے کہ ہر دو سال بعد منعقد ہونے والی اس نمائش کے انعقاد سے پاک فوج کے تینوں شعبہ جات کو اپنی عسکری قوت نمایاں کرنے کا موقع ملتا ہے۔ اس موقع پر ثقافتی پروگرام بھی منعقد کیے جاتے ہیں، حکومت اور نجی اداروں کے درمیان بھی کئی طرح کے معاہدے تشکیل دیئے جاتے ہیں۔
