لاہور : چیئرمین پی سی بی احسان مانی جمعہ کو وزیراعظم عمران خان سے ملاقات کریں گے، ورلڈکپ2019کیلئے منتخب قومی کرکٹ ٹیم بھی ان کے ہمراہ ہوگی۔
تفصیلات کے مطابق پی سی بی کے حالیہ معاملات اور ورلڈ کپ کی تیاریوں کے سلسلے میں وزیر اعظم عمران خان سے پاکستان کرکٹ بورڈ کے سربراہ احسان مانی ملاقات کریں گے۔
یہ ملاقات جمعہ کے دن شیڈول ہے، ورلڈ کپ2019کیلئے منتخب کردہ قومی کرکٹ ٹیم بھی احسان مانی کے ہمراہ ہوگی۔ اس حوالے ذرائع کا کہنا ہے کہ وزیراعظم عمران خان اور احسان مانی سے ون آن ون ملاقات بھی ہوگی۔
ملاقات میں پی سی بی کے موجودہ بحران اور آئندہ کی حکمت عملی پر تبادلہ خیال ہوگا، اس موقع پر ورلڈ کپ2019کے لئے قومی ٹیم کی تیاریوں پر بھی عمران خان کو آگاہ کیا جائے گا۔
ذرائع کا مزید کہنا ہے کہ ورلڈ کپ کی موجودہ کرکٹ ٹیم بھی1992کی فاتح ورلڈ کپ ٹیم کے کپتان عمران خان سے ملاقات کرے گی، قومی ٹیم کے کھلاڑی کل شام لاہور سے اسلام آباد کیلئے روانہ ہوں گے۔
مزید پڑھیں: پی سی بی گورننگ بورڈ کا اجلاس، ایم ڈی وسیم خان کی تقرری غیرآئینی قرار
قومی کرکٹ ٹیم اور وزیر اعظم عمران خان کی ملاقات جمعہ کو متوقع ہے، ذرائع کے مطابق وزیراعظم عمران خان قومی کھلاڑیوں کو ورلڈ کپ کے حوالے سے قیمتی مشورے دیں گے اور میگا ایونٹ سے قبل کھلاڑیوں کی حوصلہ افزائی کریں گے۔
