بیجنگ: وزیر اعظم عمران خان کی ایشیائی سرمایہ کاری بینک کے صدر سے ملاقات ہوئی، جس میں احتساب کے ذریعے منصوبوں میں شفافیت یقینی بنانے پراتفاق ہوا ہے.
تفصیلات کے مطابق دورہ چین کے موقع پر ہونے والی اس اہم ملاقات میں سرمایہ کاری بینک نے پاکستانی منصوبوں میں سرمایہ کاری کی حمایت کا اعلان کیا ہے.
اس موقع پر وزیراعظم نے کہا کہ بطور بانی رکن پاکستان بینک کے مشن کی حمایت کرتا ہے، بینک نے پاکستان میں منصوبوں کے لئے مالی تعاون کیا.
وزیراعظم عمران خان نے کہا کہ ایشیائی سرمایہ کاری بینک سے مالی تعاون کے لئے پرامید ہیں، حکومت پاکستان اقتصادی بحالی کے لئےاصلاحات کررہی ہے.
ان کا کہنا تھا کہ پاکستان میں بجلی،ٹرانسپورٹ،پانی میں سرمایہ کاری کےمواقع ہیں، ایشیائی سرمایہ کاری بینک پاکستان میں نئی سرمایہ کاری کرے.
ملاقات کے بعد سرمایہ کاری بینک نے پاکستانی منصوبوں میں سرمایہ کاری کی حمایت کا اعلان کرتے ہوئے پاک چین منصوبوں میں شمولیت کا گرین سگنل دیا ہے.
مزید پڑھیں: وزیراعظم عمران خان کی چین کے صدر شی جن پنگ سے ملاقات
ملاقات میں احتساب کے ذریعےمنصوبوں میں شفافیت یقینی بنانے پر اتفاق ہوا ہے.
یاد رہے کہ آج وزیراعظم عمران خان نے چین کے صدر شی جن پنگ سے ملاقات کی، اس موقع پر صدر شی جن پنگ نے انتخابات جیتنے پر وزیر اعظم عمران خان کو مبارک باد دی۔ ملاقات میں پاک چین تزویراتی شراکت داری کے تمام پہلوؤں کا جائزہ لیا گیا۔
