The news is by your side.

Advertisement

پناہ گاہوں میں سہولیات کی فراہمی میں بہتری لائی جائے، وزیراعظم

اسلام آباد : وزیر اعظم عمران خان نے کہا ہے کہ جن پناہ گاہوں پر لوگوں کا رش ہے ان پر خصوصی توجہ دیتے ہوئے سہولیات کی فراہمی میں بہتری لائی جائے۔

یہ ہدایات انہوں نے ملاقات کیلئے آنے والی معاون خصوصی برائے تخفیف غربت وسماجی تحفظ ثانیہ نشتر سے گفتگو کرتے ہوئے دیں اس موقع پر ایم ڈی بیت المال، چیئرمین سی ڈی اے اور متعلقہ افسران بھی موجود تھے۔

وزیراعظم نے کہا کہ پناہ گاہوں کا سیاست سے کوئی تعلق نہیں، ان کا تعلق اللہ اور اس کی مخلوق کی خدمت سے ہے، پناہ گاہوں کے قیام کا مقصدغریب طبقے کے لوگوں کے وقار کو مجروح ہونے سے بچانا ہے۔

عمران خان کا کہنا تھا کہ پناہ گاہوں سے پہلےغریب مزدور سڑکوں پر سونے پر مجبور تھے، منصوبے کے مطابق مثالی پناہ گاہوں کا قیام جلد عمل میں لایا جائے۔

اس موقع پر وزیراعظم عمران خان کو پناگاہوں کی صورتحال اور بہتری کیلئے بنائے گئے منصوبے پر بریفنگ دی گئی جس میں بتایا گیا کہ منصوبے پر 3مرحلوں میں عمل درآمد کیا جائے گا۔

بریفنگ میں کہا گیا کہ موجودہ پناہ گاہوں میں سہولیات کی فراہمی میں بہتری لائی جائے گی، نجی بین الاقوامی ہوٹل سے پناگاہوں کے عملے کو تربیت دلائی جائے گی۔

اس کے علاوہ پالیسی پر عمل درامد کیلئے ایک مرکزی بورڈ تشکیل دیا جائے گا، انتظامی معاملات دیکھنے کے لئے پناہ گاہ میں4رکنی بورڈ تشکیل پائے گا۔

بریفنگ کے مطابق سہولیات پر ڈیجیٹل ڈیش بورڈ بنایا جائے گا جو نگرانی میں مدد کرے گا، ڈیش بورڈ کو موبائل کے ذریعے باآسانی چلایا جاسکے گا۔

وزیراعظم عمران خان کو بریفنگ میں بتایا گیا کہ موجودہ پناہ گاہوں میں مسائل کی نشاندہی کرکےان کوحل کیا جائے گا اور پناہ گاہوں کے ساتھ احساس ون ونڈو سینٹرز بھی کھولے جائیں گے۔

Comments

یہ بھی پڑھیں