اسلام آباد : وزیراعظم عمران خان نے مشترکہ مفادات کونسل کا 42 واں اجلاس 6 اگست کو طلب کرلیا، جس میں 8 نکاتی ایجنڈے پرغور کیا جائے گا۔
تفصیلات کے مطابق مشترکہ مفادات کونسل کا 42 واں اجلاس 6 اگست کو طلب کرلیا گیا، وزیراعظم عمران خان اجلاس کی صدارت کریں گے، چاروں وزرائے اعلیٰ سمیت وفاقی وزرا، اٹارنی جنرل اور حکام اجلاس میں شریک ہوں گے۔
مشترکہ مفادات کونسل 8 نکاتی ایجنڈے پرغور کرے گی، اوگرا آرڈیننس 2002 میں ترمیم کا معاملہ ، لوئرپورشن چشمہ کنال کاپنجاب کو کنٹرول دینے کا معاملہ ایجنڈے میں شامل ہیں۔
اجلاس میں کورونا وائرس کےخلاف قومی سطح کی حکمت عملی پرغور ہو گا جبکہ 17-2018کی مشترکہ مفادات کونسل کی سالانہ رپورٹ بھی پیش ہوگی۔
اجلاس میں صوبوں میں پانی کے مسئلے پر گزشتہ اجلاس کےفیصلوں کی روشنی میں تجاویز پیش ہوں گی جبکہ معدنیات کے1948 ایکٹ میں ترمیم کامعاملہ ایجنڈے میں شامل ہیں۔
مشترکہ مفادات کونسل کے اجلاس میں 18ویں ترمیم کے بعد ایچ ای سی سےمتعلق فیصلوں پر عملدرآمد ، عوامی فلاح اورصحت سے متعلق فیصلوں ، ٹیکس،ایل این جی کی امپورٹ سمیت دیگرامورپرفیصلوں اور 23دسمبر 2019 کو41 ویں اجلاس کے فیصلوں پر عملدرآمد کا جائزہ لیا جائے گا۔
