The news is by your side.

وزیراعظم عمران خان کا اسلام آباد کے شہریوں اور تاجروں کے لئے بڑا فیصلہ

اسلام آباد : وزیراعظم عمران خان نے اسلام آباد کے شہریوں اور تاجروں کے لئے بڑا فیصلہ کرلیا، وزارت قانون نے قانون کرایہ داری اصلاحات کے لیے تجاویز مرتب کرلیں، وزیراعظم سے منظوری کے بعد کرایہ داری قانون کی ڈرافٹنگ کی جائے گی۔

وزیراعظم عمران خان کا اسلام آباد کو مثالی بنانے کا خواب پورا ہونے لگا، اسلام آباد کے شہریوں اور تاجروں کے لئے بڑا فیصلہ کرلیا اور قانون کرایہ داری میں اصلاحات اور عملدرآمد کے لیے ہدایات جاری کردی ہے۔

وزارت قانون نے قانون کرایہ داری اصلاحات کے لیے تجاویز مرتب کرلیں، وزیراعظم سے منظوری کے بعد کرایہ داری قانون کی ڈرافٹنگ کی جائے گی، سول عدالتوں میں 15 فیصد تک زیر سماعت تنازعات کرایہ داری سے متعلق ہیں، مقدمات عمومی طور پر مقامی عدالتوں سے ہوتے سپریم کورٹ تک جاتے ہیں۔

دستاویز کے مطابق کرایہ داری مقدمات کےفیصلوں میں 15سے20سال لگ جاتےہیں، قانون کرایہ داری کو بہتر بنانے اورعملدرآمد کے لیے اقدامات کی ضرورت ہے ، آئندہ کرایہ داری معاہدے کی رجسٹریشن کو لازمی قرار دیا جائے، کرایہ داری سےمتعلق کسی بھی زبانی معاہدے کی ممانعت لازمی قرار دی جائے۔

دستاویز میں کہا گیا ہے کہ رجسٹرڈ معاہدے کی مدت ختم ہوتے ہی کرایہ دار جگہ چھوڑنے کا پابند ہوگا، مدت معاہدہ میں کسی قسم کی توسیع نہ کی جائے گی، تنازع کی صورت میں رجسٹرار کو پراپرٹی خالی کرانے کا اختیار دیا جائے۔

جسٹرار کو پراپرٹی خالی کرانے کے لئے پولیس کی معاونت دی جائے، اصلاحات اورعملدرآمد سے سول کورٹس میں مقدمات کم ہوسکتے ہیں۔

یاد رہے 13 نومبر وزیرِاعظم عمران خان کی زیرِ صدارت ہونے والے اجلاس میں اسلام آباد سے متعلق بڑا فیصلہ کرتے ہوئے شہر کا ماسٹر پلان تبدیل کرنے کی منظوری دی تھی، وزیرِ اعظم نے کہا تھا کہ اسلام آباد کا ماسٹر پلان تبدیل کرنے سے مقامی لوگوں کے مسائل میں کمی آئے گی۔

Comments

یہ بھی پڑھیں