اسلام آباد : وزیراعظم عمران خان آج احساس انڈرگریجویٹ اسکالرشپ پروگرام کا آغازکریں گے، جس کے تحت مستحق ذہین طلبہ میں وظائف تقسیم کیےجائیں گے، احساس اسکالر شپ پروگرام پاکستان کی تاریخ میں سب سےبڑا پروگرام ہے۔
تفصیلات کے مطابق وزیراعظم عمران خان نوجوانوں کے لئے پاکستان کی تاریخ میں سب سے بڑی اسکالرشپ پروگرام کا آج آغاز کرنے جارہے ہیں ، احساس انڈرگریجویٹ اسکالر شپ پروگرام کے تحت مستحق ذہین طلباو طالبات میں وظائف تقسیم کئے جائیں گے۔
وزیر اعظم تعلیمی سال19-2020 کے پہلےمرحلے کی احساس اسکالرشپس طلبا کو دیں گے، پروگرام پر عملدرآمد کیلئے سالانہ 6ارب روپےمختص کئے گئے ہیں، احساس انڈرگریجویٹ 4سالہ پروگرام کیلئے 24 ارب کے وظائف دئیے جائیں گے۔
اسکالرشپس طلبا کو ضرورت اور میرٹ کی بنیاد پر دئیے جائیں گے ، ہر طالبعلم کو ٹیوشن فیس کیساتھ ماہانہ 4ہزارروپےگزر بسر کا وظیفہ بھی دیا جائے گا، اس اسکالرشپ سے ملک کے سرکاری جامعات کے 2 لاکھ مستحق طلبا مستفید ہوں گے۔
مزید پڑھیں : وزیراعظم عمران خان کا ہر سال 50ہزار اسکالر شپ دینے کا بڑا اعلان
احساس انڈرگریجویٹ اسکالرشپس پروگرام کے تحت اعلیٰ تعلیم کیلئے ہر سال50 ہزار طلبہ کواسکالر شپس دیئے جائیں گے جبکہ 50 فیصد کوٹہ طالبات کا ہوگا اور 2 فیصداسکالرشپس خصوصی معذور طلبہ کو دی جائیں گی، اسکالرشپ کا دارومدار مستقبل میں طلبا کی تعلیمی کارکردگی پر ہوگا۔
یاد رہے وزیراعظم عمران خان نے ہر سال 50ہزاراسکالرشپ دینے کا اعلان کرتے ہوئے کہا تھا کہ آنے والے دنوں میں مزید خوشخبریاں ملیں گی۔
عمران خان کا کہنا تھا کہ اسکولوں ، تعلیمی نظام پرکوشش کررہےہیں کہ بہترین تعلیم ملے، سسٹم ٹھیک کررہےہیں کہ ملک میں ایک نصاب ہو، امیر کیلئے الگ غریب کیلئے الگ نصاب نہیں ہوگا سب کو ایک تعلیم ملےگی، تعلیم کانظام ٹھیک کرنے لگے ہیں۔جوآسان نہیں70سال سے خراب نظام ہے۔
