The news is by your side.

Advertisement

اپنا مؤقف اور عزم سیاسی نقشے میں ظاہر کر دیا: وزیر اعظم

اسلام آباد: وزیر اعظم عمران خان نے کہا ہے کہ میں بطور سفیر مظلوم کشمیریوں کی آواز بنا رہوں گا، ہم نے اپنے عزائم اور مؤقف کو کل پاکستان کے سیاسی نقشے میں نمایاں کر دیا ہے۔

تفصیلات کے مطابق وزیر اعظم نے آج یوم استحصال کشمیر پر ایک ٹویٹ میں لکھا ہے کہ آج وہ کشمیریوں سے اظہار یک جہتی کے لیے آزاد کشمیر اسمبلی سے خطاب کریں گے، انھوں نے لکھا 5 اگست کے غیر قانونی اقدام کے بعد سے کشمیری فوجی محاصرے میں ہیں، بھارت مقبوضہ وادی کی ڈیموگرافی تبدیل کرنے کی کوشش کر رہا ہے۔

ان کا کہنا تھا حکومت نے کشمیر کا مقدمہ نہایت مؤثر طریقے سے اقوام متحدہ میں اٹھایا، ہم نے مودی سرکار کی نسل پرست انتہا پسند سوچ کو بے نقاب کیا، ہمارا مؤقف اہلِ کشمیر کی امنگوں، یو این قراردادوں کے مطابق ہے۔

وزیر اعظم ہاؤس سے جاری اپنے پیغام میں بھی وزیر اعظم نے کہا کہ بھارت کے 5 اگست کے غیر قانونی اور یک طرفہ اقدام کا 365 واں دن ہے، غیر انسانی فوجی محاصرے اور مواصلاتی ناکہ بندی کو ایک سال ہو گیا، انسانیت کے خلاف جرم نے مقبوضہ کشمیر میں زندگیاں تباہ کر دیں، 8 لاکھ کشمیریوں کو اپنے گھروں میں قیدی بنا دیا گیا ہے۔

بھارت کا غیر قانونی اقدام، آج دنیا بھر میں ”یوم استحصال “منایا جائے گا

پیغام میں انھوں نے کہا ہے کہ وادی کے بیرونی دنیا سے مواصلاتی رابطوں کو بھی قابض بھارتی افواج کے ذریعے روک دیا گیا ہے، اور بڑے پیمانے پر انسانی حقوق کی پامالیوں کو چھپانے کی کوشش کی جا رہی ہے، لیکن کشمیری عوام نے ان غیر قانونی ہتھکنڈوں کو مسترد کر دیا ہے، پاکستان نے بھی مقبوضہ کشمیر کے لیے انسانی حقوق کی مسلسل خلاف ورزیوں پر آواز اٹھائی ہے۔

وزیر اعظم نے کہا ہے کہ پاکستانی پارلیمنٹیرینز، صحافیوں اور انسانی حقوق کی تنظیموں نے بھی کشمیر کے لیے آواز اٹھائی ہے، بھارت دنیا کے سامنے بری طرح بے نقاب ہو چکا ہے، اب عالمی برادری انسانی وقار کی خاطر فوری ضروری قدم اٹھائے، عالمی برادری بھارتی اقدامات کی مذمت کرتے ہوئے عملی اقدامات کرے، بھارت پر دباؤ ڈالنا ہوگا کہ وہ اپنے حالیہ اقدامات ہر صورت واپس لے۔

وزیر اعظم نے ایک بار پھر واضح کیا کہ پاکستان ہمیشہ مقبوضہ کشمیر کے بہن بھائیوں کا ساتھ دے گا، کشمیریوں پر غیر قانونی بھارتی اقدامات اور ظلم کسی صورت قبول نہیں، بھارت پہلے ہی کشمیریوں کی آواز عالمی برادری تک پہنچنے سے روکنےمیں ناکام رہا، بھارت سمجھ لے ایک کشمیری کی شہادت بھی تحریک کو مزید آگے بڑھائے گی، حق خودارادیت کے حصول تک پاکستان کشمیریوں کے شانہ بشانہ رہے گا۔

Comments

یہ بھی پڑھیں