The news is by your side.

بے گھر اور بے سہارا افراد کی کفالت ریاست کی ذمہ داری ہے، وزیراعظم

اسلام آباد: وزیراعظم عمران خان نے کہا ہے کہ بے گھر اور بے سہارا افراد کی کفالت ریاست کی ذمہ داری ہے، بے گھر افراد کی کفالت پی ٹی آئی حکومت کے ایجنڈے کا بنیادی جزو ہے۔

تفصیلات کے مطابق وزیراعظم عمران خان نے پیرودھائی کے قریب پناہ گاہ کا اچانک دورہ کیا، وزیراعظم نے شب معراج کے موقع پر پناہ گاہ میں موجود افراد کے لیے سہولتوں کا جائزہ لیا۔

وزیراعظم نے پناہ گاہ میں موجود افراد سے سہولیات سے متعلق دریافت کیا اور مناسب سہولیات کی دستیابی پر اطمینان کا اظہار کیا۔

عمران خان نے کہا کہ نادار افراد کی کفالت کے حوالے سے حکومت ہر ممکن کوشش کرے گی، پورے ملک میں مزید پناہ گاہیں قائم کی جائیں گی۔

وزیراعظم کا کہنا تھا کہ پناہ گاہوں کو مزید وسیع کیا جائے گا تاکہ زیادہ افراد مستفید ہوسکیں، پناہ گاہوں کی تعمیر میں مخیر حضرات کا تعاون، پیشکش حوصلہ افزا ہے۔

مزید پڑھیں: راولپنڈی : وزیراعظم عمران خان نے ہولی فیملی اسپتال اور “پناہ گاہ” کا دورہ کیا

واضح رہے کہ تین ماہ قبل وزیراعظم نے ہولی فیملی اسپتال اور پناہ گاہ کا ہنگامی دورہ کیا تھا اور اسپتال میں مریضوں کو دی جانے والی سہولیات کا جائزہ لے کر وزیر صحت سے تفصیلی رپورٹ طلب کی تھی۔

وزیر اعظم کا کہنا تھا کہ سخت سردی کے موسم میں خلق خدا کیلئے گرم بستر اور خوراک کی فراہمی عظیم خدمت ہے، چھت سےمحروم افرادکیلئےسہولتوں کا بندوبست لائق تحسین ہے۔

ان کا کہنا تھا کہ پسے ہوئے محروم انسانوں کی نگہداشت معاشرے کی ذمہ داری ہے، شہریوں کاانسانیت کی خدمت کیلئےآگےبڑھنا نہایت حوصلہ افزا ہے۔

Comments

یہ بھی پڑھیں