The news is by your side.

Advertisement

خطے میں رنجشیں اور غربت کے خاتمے کا مشن، وزیر اعظم آج بحرین جائیں گے

اسلام آباد: خطے میں رنجشیں اور غربت کے خاتمے کا مشن لیے وزیر اعظم عمران خان مسلسل عرب ریاستوں کے اہم دورے کر رہے ہیں، سعودی عرب سے واپسی کے بعد آج بحرین کا دورہ کریں گے۔

تفصیلات کے مطابق وزیر اعظم عمران خان آج بحرینی ہم منصب حماد بن الخلیفہ کی دعوت پر بحرین جائیں گے، وزیر اعظم بحرین کے قومی دن کی تقریب میں شرکت کریں گے، اور امیر بحرین حماد بن الخلیفہ سے ون آن ون ملاقات ہوگی۔

امیر بحرین کے ساتھ ملاقات میں خطے کی صورت حال پر بات کی جائے گی، وزیر اعظم عمران خان کو بحرین کا سب سے بڑا سول ایوارڈ بھی دیا جائے گا۔

خیال رہے کہ پاکستان کی قومی قیادت خطے میں پائیدار امن اور استحکام اور مسلم امہ کے اتحاد و اتفاق کے لیے کوشاں ہے، گزشتہ روز وزیر اعظم نے سعودی عرب کا چوتھا دورہ کیا، جس میں انھوں نے ریاض میں سعودی عرب کے ولی عہد شہزادہ محمد بن سلمان سے اہم ملاقات کی، جس میں باہمی تعلقات مزید مضبوط بنانے اور مشرق وسطیٰ کے تنازعات کے لیے مشترکہ کوششوں پر اتفاق کیا گیا، آرمی چیف جنرل قمر جاوید باجوہ نے بھی متحدہ عرب امارات کا کامیاب دورہ کیا۔

وزیر اعظم ہاؤس کے اعلامیے میں بتایا گیا کہ پاکستان اور سعودی عرب نے خطے میں قیام امن کے لیے مشترکہ کوششیں جاری رکھنے، اور باہمی اسٹریٹیجک شراکت داری کو نئی بلندیوں پر لے جانے کاعزم کیا، ولی عہد شہزادہ محمد بن سلمان سے ملاقات کے دوران مشرق وسطیٰ کے تنازعات کو سیاسی اور سفارتی ذرایع سے حل کرنے پر زور دیا گیا، مقبوضہ کشمیر کی تازہ صورت حال سے بھی آگاہ کیا گیا۔

ملاقات میں سعودی ولیٔ عہد کو لائن آف کنٹرول پر جاری بھارتی جارحیت پر بھی اعتماد میں لیا گیا، وزیر اعظم نے جی ٹوئنٹی کی صدارت ملنے پر سعودی ولی عہد کو مبارک باد دی اور کہا کہ یہ سعودی قیادت کا عالمی کمیونٹی میں کردار کا عکاس ہے، دورہ مکمل ہونے پر شہزادہ محمد بن سلمان نے ہوائی اڈے پر آ کر وزیر اعظم کو رخصت کیا۔

ادھر پاک فوج کے سپہ سالار جنرل قمر جاوید باجوہ نے بھی گزشتہ روز یو اے ای کا کام یاب دورہ کیا، ڈی جی آئی ایس پی آر نے بتایا کہ آرمی چیف اور یو اے ای کے ولی عہد شیخ محمد بن زاید النہیان کی اہم ملاقات ہوئی، ملاقات میں علاقائی سیکورٹی صورت حال اور باہمی دل چسپی کے امور پر بات چیت کی گئی۔

Comments

یہ بھی پڑھیں