جہلم : وزیر اعظم عمران خان نے تربیلا ڈیم کے پانچویں توسیعی منصوبے کا سنگ بنیاد رکھ دیا ،منصوبہ ہر سال نیشنل گرڈ کو ایک ارب 34 کروڑ یونٹ سستی بجلی مہیا کرے گا۔
تفصیلات کے مطابق وزیر اعظم عمران خان نے تربیلا ڈیم کےپانچویں توسیعی منصوبے کا سنگ بنیاد رکھ دیا ، منصوبہ 807 ملین ڈالر کی لاگت سے تعمیر کیا جارہا ہے۔
اس منصوبے میں ورلڈ بینک اور ایشین انفراسٹرکچر انویسٹمنٹ بینک مالی معاونت فراہم کر رہے ہیں ، جو محض 3 سال کی قلیل مدت میں 2024 تک مکمل کر لیا جائے گا۔
منصوبے کا بنیادی مقصد تربیلا ڈیم کو مٹی بھرنے کے خطرات سے محفوظ بنانا ہے ، منصوبے کے باعث تربیلا ڈیم سے زرعی مقاصد کےلئے پانی کی دستیابی جاری رہے گی جبکہ 1530 میگاواٹ ماحول دوست اور سستی پن بجلی بھی حاصل ہو گی۔
منصوبہ ہر سال نیشنل گرڈ کو ایک ارب 34 کروڑ یونٹ سستی بجلی مہیا کرے گا، تربیلاپانچویں توسیعی منصوبے سے3 ہزار ملازمتوں کے مواقع پیدا ہو ں گے
اس توسیع منصوبے سے تربیلا سے بجلی پیدا کرنے کی صلاحیت بڑھ کر 6 ہزار 418 میگاواٹ ہو جائے گی۔
