The news is by your side.

Advertisement

وزیراعظم عمران خان رواں ماہ ‘احساس نشوونما پروگرام’ کا اجرا کریں گے

اسلام آباد : معاون خصوصی ڈاکٹر ثانیہ نشتر کا کہنا ہے کہ وزیراعظم رواں ماہ احساس نشوونما پروگرام کا اجرا کریں گے، ابتدائی مرحلےمیں 9 اضلاع میں31 نشوونما مراکز قائم کئے جائیں گے، پروگرام میں احساس کو عالمی ادارہ خوراک کا تعاون حاصل ہے۔

تفصیلات کے مطابق معاون خصوصی ڈاکٹر ثانیہ نشتر نے سماجی رابطے کی ویب سائٹ ٹوئٹر پر نشوونماپروگرام کے حوالے سے اپنے پیغام میں کہا کہ نومولود بچے کی زندگی کے ابتدائی ہزار دن انتہائی نازک ہوتے ہیں، نشوونما روکنےکی بیماری کاعلاج نہ کریں توزندگی بھر کاروگ بن سکتا ہے اور اس بیماری سے متاثرہ بچے کی جسمانی وذہنی نشوونمانارمل نہیں ہو پاتی۔

معاون خصوصی کا کہنا تھا کہ پاکستان میں بچوں میں نشوونما کا مسئلہ ہمیشہ سے وزیراعظم کی ترجیح رہاہے، وزیراعظم نے پہلے خطاب میں قوم سے نشوونما کے مسئلےکو اجاگر کیا تھا اور اس مسئلے کوحکومتی ایجنڈےمیں بھی سرفہرست رکھا۔

ڈاکٹر ثانیہ نشتر نے کہا کہ قومی نیوٹریشن سروے کے مطابق 1965 سے لے کر 2017 تک 5سال سےکم عمربچوں میں نشونما کی صورتحال میں بہتری نہ آسکی۔

ان کا کہنا تھا کہ صوبائی و علاقائی لحاظ سے کم عمر بچوں میں اس بیماری کی سب سے زیادہ شرح کے پی، قبائلی اضلاع، بلوچستان، گلگت بلتستان اور سندھ میں ہے۔

معاون خصوصی نے ایک اور ٹوئٹ میں کہا کہ یہ پروگرام جامع منصوبہ ، تکنیکی مشاورت،پبلک پرائیویٹ اشتراک کانتیجہ ہے، پروگرام کی تیاری کیلئے مشاروتوں کا آغاز جنوری 2019 سے ہی ہوگیا تھا۔

ثانیہ نشتر کا کہنا تھا کہ اردن کی شہزادی سے دورہ پاکستان پراحساس نشوونما پروگرام پر مشاورت ہوئی، شہزادی سارہ زید عالمی ادارہ خوراک کی خصوصی مشیربرائےغذائی قلت ہیں۔

انھوں نے مزید بتایا کہ احساس نشوونما پروگرام میں احساس کو عالمی ادارہ خوراک کا تعاون حاصل ہے، فروری 2020 میں احساس،عالمی ادارہ خوراک مفاہمتی یاداشت پردستخط ہوئے، عالمی ادارہ خوراک کو ایسے پروگراموں میں خاص مہارت حاصل ہے۔

معاون خصوصی کا کہنا تھا کہ نشوونماپروگرام کےتحت صحت بخش غذاکےساشےمفت تقسیم کریں گے ، ساشے ان کو تقسیم ہوں گے، جن میں نشوونما کی بیماری ہونے کاخدشہ ہو۔

ثانیہ نشتر نے کہا کہ وزیراعظم رواں ماہ احساس نشوونما پروگرام کا اجراکریں گے، ابتدائی مرحلےمیں 9 اضلاع میں31 نشوونما مراکز قائم کئے جائیں گے۔

ان کا کہنا تھا کہ پہلانشوونما مرکز ضلع راجن پور کے علاقےجام پور میں قائم کیا جا رہا ہے، نشوونما مراکز کے قیام کے لیئے تیاریاں زور و شور سے جاری ہیں۔

fb-share-icon0
Tweet 20

Comments

comments

یہ بھی پڑھیں