اسلام آباد : وزیراعظم عمران خان سے آرمی چیف جنرل قمر جاوید باجوہ نے اہم ملاقات کی، پاک بھارت حالیہ کشیدگی اور ملک کی داخلی و خارجی سیکیورٹی کی صورتحال سمیت پاک فوج کے پیشہ وارانہ امور کا جائزہ لیا گیا۔
تفصیلات کے مطابق وزیراعظم عمران خان اور آرمی چیف جنرل قمر جاوید باجوہ کے درمیان ون آن ون ملاقات وزیراعظم آفس میں ہوئی، ملاقات کے دوران علاقائی سکیورٹی اور خطے میں سلامتی کی صورت حال پر تبادلہ خیال کیا گیا۔
ملاقات میں پاک بھارت تناو کی حالیہ صورت حال اور سرحد پر جاری کشیدگی کا بھی جائزہ لیا گیا اور آرمی چیف نے وزیراعظم عمران خان کو پاک فوج کی پیشہ ورانہ تیاریوں پر بریفنگ دی۔
وزیراعظم عمران خان نے بھارتی جارحیت کے جواب میں مسلح افواج کے کردار کو بھرپورانداز میں سراہتے ہوئے کہا کہ پاکستان کسی کے خلاف جارحانہ عزائم نہیں رکھتا، تاہم اپنے دفاع کا حق استعمال کرتے رہیں گے۔
یاد رہے 21 فروری کو قومی سلامتی کمیٹی کےاجلاس سےقبل وزیراعظم عمران خان سےآرمی چیف جنرل قمرجاویدباجوہ کی ملاقات ہوئی تھی، جس میں ملک کی مجموعی صورتحال پر تبادلہ خیال کیا گیاتھا۔
قومی سلامتی کمیٹی کےاجلاس میں ملک کی مجموعی سیکیورٹی صورتحال اور افغان امن عمل اور پاکستان کی کوششوں کا جائرہ لیا گیا جبکہ ملکی سلامتی کودرپیش حالیہ چیلنجز سے نمٹنےکی حکمت عملی پر بھی مشاورت کی گئی تھی۔
اجلاس میں پلوامہ حملےکےنتیجےمیں بھارتی پروپیگنڈااورموجودہ صورتحال کاجائزہ لیاگیا جبکہ مقبوضہ کشمیر میں بھارتی جارحیت کی بھی مذمت کی گئی تھی۔
