The news is by your side.

Advertisement

وزیراعظم کا کورونا ریلیف ٹائیگر فورس کی نوجوانوں کی جانب سے پذیرائی پر اظہار مسرت

اسلام آباد : وزیراعظم عمران خان نے کورونا ریلیف ٹائیگرفورس میں نوجوانوں کی جانب سے پذیرائی پر اظہار مسرت کرتے ہوئے کہا ملک کے نوجوانوں سے اسی جذبےکی امید تھی ، نوجوان ملک کا اثاثہ ہیں،کسی سطح پرمایوس نہیں کریں گے۔

تفصیلات کے مطابق وزیراعظم عمران خان سے معاون خصوصی عثمان ڈار کی ملاقات ہوئی، جس میں کورونا ریلیف ٹائیگرفورس کی تشکیل اور رجسٹریشن پر مشاورت ہوئی۔

ملاقات میں عثمان ڈار نے رجسٹریشن مرحلے اور تازہ اعدادو شمار سےوزیراعظم کو آگاہ کرتے ہوئے بتایا 24 گھنٹے میں رجسٹرڈنوجوانوں کی تعداد3لاکھ کےقریب پہنچ گئی ہے اور 2 لاکھ80ہزارسےزائدنوجوان ٹائیگرفورس کاحصہ بن چکے ہیں۔

وزیراعظم عمران خان نے نوجوانوں کی جانب سے پذیرائی پر اظہار مسرت کرتے ہوئے کہا ملک کے نوجوانوں سے اسی جذبےکی امید تھی ، نوجوان ملک کا اثاثہ ہیں،کسی سطح پرمایوس نہیں کریں گے۔

ملاقات کے دوران ٹائیگر فورس کے کام کرنے کےطریقہ کار پر بھی مشاورت ہوئی، عثمان ڈار نے کہا ٹائیگر فورس کے آپریشنل معاملات صوبے خود دیکھیں گے، چیف سیکریٹریز،ڈپٹی کمشنرز ،عوامی نمائندے بھی معاونت کریں گے، وفاقی حکومت صوبوں کو بھرپور معاونت فراہم کرے گی۔

وزیراعظم نے مختصر وقت میں بہترین کام پرمعاون خصوصی کی کوششوں کو سراہتے ہوئے کہا قومی جذبے کے تحت فورس کی تشکیل کا عمل جلد مکمل کیا جائے۔

خیال رہے جہاں کوروناریلیف ٹائیگر فورس کی ملک بھر کےنوجوانوں میں زبردست پذیرائی ہوئی وہیں رجسٹریشن کے نام پر عوام کو لوٹنے والے جعلساز عناصر بھی سرگرم ہیں اور نوجوانوں کو رجسٹریشن کےلئےجعلی ٹیلی فون کالز موصول ہونا بھی شروع ہوگئی ہے۔

وزیراعظم کے معاون خصوصی عثمان ڈار نے معاملے پر نوٹس لیتے ہوئے ایف آئی اےسائبر کرائم سمیت متعلقہ اداروں سے رابطے کا فیصلہ کیا ہے۔

عثمان ڈار نےفیک کال کرنے والی کی گفتگو اور فون نمبر میڈیا پر جاری کر دیا اور نوجوانوں سے کسی قسم کی فیک ٹیلی فونک گفتگو سے محتاط رہنے کی ہدایت کی ہے۔

Comments

یہ بھی پڑھیں