The news is by your side.

Advertisement

وزیر اعظم سے سعودی شہزادے سلطان بن سلمان کی ملاقات

اسلام آباد: وزیر اعظم عمران خان اور سعودی شہزادے پرنس سلطان بن سلمان بن عبد العزیز السعود کی ملاقات ہوئی، ملاقات میں وزیر اعظم نے اسلامو فوبیا سے متعلق اقدامات اور مؤثر بیانیے کی ضرورت پر زور دیا۔

تفصیلات کے مطابق وزیر اعظم عمران خان سے سعودی عرب کے 3 رکنی اعلیٰ سطح کے وفد کی ملاقات ہوئی۔ وفد کی قیادت سعودی شہزادے پرنس سلطان بن سلمان بن عبد العزیز السعود نے کی۔

ملاقات وزیر اعظم آفس میں ہوئی جس میں وزیر خارجہ شاہ محمود قریشی، وفاقی وزیر برائے فوڈ سیکیورٹی خسرو بختیار اور سیکریٹری خارجہ بھی موجود تھے۔

ملاقات میں وزیر اعظم نے اسلامو فوبیا سے متعلق اقدامات اور مؤثر بیانیے کی ضرورت پر زور دیا۔ وزیر اعظم کا کہنا تھا کہ اسلامی تہذیب کو اجاگر کرنے کے لیے نوجوانوں کی شمولیت یقینی بنانا چاہیئے۔

سعودی شہزادے سلطان بن سلمان نے کہا کہ مسلم دنیا کو اسلام سے متعلق غلط فہمیوں کے خاتمے کے لیے کوششیں کرنا ہوں گی۔

وزیر اعظم عمران خان نے پاکستان میں فلاحی کاموں پر سعودی شہزادے کی تعریف کی، انہوں نے کہا کہ پاکستان اور سعودی عرب کے مذہب، ثقافت اور تاریخ پر مبنی تعلقات ہیں۔ معاشی تعاون اور اقتصادی اقدامات پر سعودی قیادت کے شکر گزار ہیں۔

شہزادہ سلطان نے بھی سعودی عرب کی ترقی کے لیے مختلف شعبوں میں پاکستان کے کردار کو سراہا۔

وزیر اعظم نے سعودی شہزادے کو مقبوضہ کشمیر میں انسانی حقوق کی بدترین خلاف ورزیوں سے بھی آگاہ کیا۔ وزیر اعظم کا کہنا تھا کہ 100 سے زائد دن ہوچکے کشمیری بدترین لاک ڈاؤن کا شکار ہیں۔ بین الاقوامی برادری معصوم کشمیریوں کی جدوجہد کا ساتھ دے۔

انہوں نے کہا کہ پاکستان میں سیاحت اور معیشت کے شعبے میں ترقی کے بے پناہ مواقع ہیں، کرنٹ اکاؤنٹ سر پلس سمیت اقتصادی اعداد و شمار میں بہتری آرہی ہے۔

یاد رہے کہ وزیر اعظم عمران خان نے گزشتہ ماہ سعودی عرب کا دورہ بھی کیا تھا جہاں انہوں نے سعودی فرماں روا خادم حرمین شریفین شاہ سلمان بن عبد العزیز اور سعودی ولی عہد شہزادہ محمد بن سلمان سے ملاقاتیں کی تھیں۔

ملاقاتوں میں دو طرفہ تعلقات، خطے میں امن اور عالمی سیاسی صورتحال پر تبادلہ خیال کیا گیا۔

وزیر اعظم عمران خان نے سعودی قیادت کے ساتھ علاقائی امن کی خاطر خطے میں اختلافات ختم کرنے پر گفتگو کی اور تنازعات کے سیاسی اور سفارتکاری کے ذریعے حل پر زور دیا تھا۔

وزیر اعظم نے شاہ سلمان کو مقبوضہ کشمیر کی صورت حال سے بھی آگاہ کیا تھا۔

fb-share-icon0
Tweet 20

Comments

comments

یہ بھی پڑھیں