The news is by your side.

Advertisement

وزیراعظم کےخلاف تحریک عدم اعتماد ضابطے کے مطابق قرار

اسلام آباد: قومی اسمبلی سیکرٹریٹ نے اپوزیشن کی وزیراعظم کےخلاف تحریک عدم اعتماد ضابطےکےمطابق قرار دے دی ہے۔

اے آر وائی نیوز کے مطابق اپوزیشن کی تحریک عدم اعتماد اور ریکوزیشن پر اراکین کے دستخطوں کی تصدیق کا عمل مکمل کرلیا گیا ہے۔

قومی اسمبلی ذرائع کا کہنا ہے کہ ریکوزیشن اور تحریک عدم اعتماد پر کسی بھی رکن کے دستخط مشکوک یا رول آف سائن کے خلاف نہیں نکلے، جس کے بعد سیکرٹریٹ نے وزیراعظم کے خلاف تحریک عدم اعتماد ضابطہ کے مطابق قرار دے دی ہے۔

ذرائع کا کہنا ہے کہ قومی اسمبلی کے شعبہ قانون سازی نے تمام ضوابط پورے کرنے کے بعد فائل اسپیکر کو بھجوا دی ہے، ساتھ ہی اسپیکر قومی اسمبلی کو 22 مارچ سے قبل کسی بھی دن اجلاس بلانے کی تجویزدے دی گئی ہے۔

یہ بھی پڑھیں: اپوزیشن کو عوام کی نہیں کرپشن مقدمات کی فکر ہے، وزیراعظم

ذرائع قومی اسمبلی کا کہنا ہے کہ اجلاس بلانا ایک آئینی تقاضا ہے جس سے انحراف نہیں کیا جاسکتا، پہلا مرحلہ ریکوزیشن پر دستخطوں کی تصدیق اور دوسرا عدم اعتماد کی تحریک پر دستخطوں کی تصدیق کا تھا، دونوں مراحل مکمل ہونے اور تحریک کے ضابطہ کے مطابق ہونے کا جائزہ لیا گیا ہے۔

یاد رہے کہ آٹھ مارچ کو اپوزیشن نے وزیراعظم عمران خان کے خلاف تحریک عدم اعتماد جمع کرائی تھی، ریکوزیشن جمع کرانے کے بعد اسپیکر قومی اسمبلی 15 دن میں اجلاس بلانے کے پابند ہیں۔

اسمبلی رول کے مطابق دوران اجلاس تحریک عدم اعتماد پر7دن میں کارروائی کرنا ہوگی۔

Comments

یہ بھی پڑھیں