اسلام آباد: وزیر اعظم عمران خان نے چین میں مسافر طیارے کے حادثے پر افسوس کا اظہار کرتے ہوئے کہا ہے کہ غم کی اس گھڑی میں ہم چین کے عوام کے ساتھ کھڑے ہیں۔
چین کے علاقے گوانگشی ژوانگ میں ایک مسافر طیارہ گر کر تباہ ہونے کی وجہ سے اس میں سوار تمام 132 مسافروں کی موت کا خدشہ ظاہر کیا جا رہا ہے، وزیر اعظم عمران خان نے ایک ٹویٹ میں مسافر طیارے کے حادثے پر اظہار افسوس کیا ہے۔
وزیر اعظم نے لکھا حادثے میں المناک جانی نقصان پر دکھ ہوا، ہم غم کی اس گھڑی میں چین کے عوام کے ساتھ کھڑے ہیں، اور سوگوار خاندانوں کے ساتھ تعزیت کا اظہار کرتے ہیں۔
Deeply saddened by the tragic loss of lives in the passenger plane crash in China. We share the grief of our Chinese brothers and sisters and convey our deepest condolences and sympathies with the bereaved families.
— Imran Khan (@ImranKhanPTI) March 21, 2022
واضح رہے کہ ایک بوئنگ 737 مسافر جیٹ لائنر جس میں 132 افراد سوار تھے، آج دوپہر 2 بج کر 38 منٹ پر جنوبی چین کے خود مختار علاقے گوانگشی ژوانگ میں ایک پہاڑی مقام پر گر کر تباہ ہو گیا۔
چین میں 132 مسافروں کو لے جانے والا طیارہ گر کر تباہ
چین کی سول ایوی ایشن ایڈمنسٹریشن (سی اے اے سی) نے تصدیق کی ہے کہ حادثے کا شکار ہونے والا طیارہ، چائنا ایسٹرن ایئر لائنز کا ہے، یہ طیارہ شہر کنمنگ سے گوانگژو سٹی کے لیے پرواز پر تھا، اور وزو شہر پر اس کا رابطہ منقطع ہوا۔
طیارے میں 123 مسافر اور عملے کے 9 ارکان سوار تھے، تاحال ہلاکتوں کی تعداد معلوم نہیں ہو سکی ہے، ریسکیو آپریشن بھی جاری ہے، چائنا میڈیا گروپ (سی ایم جی) نے مقامی ہنگامی انتظامی عملے کا حوالہ دیتے ہوئے اطلاع دی ہے کہ حادثے سے پہاڑی پر آگ لگ گئی تھی، جسے بجھا دیا گیا ہے۔
طیارہ حادثے کے فوراً بعد، چینی صدر شی جن پنگ نے امدادی کارروائیوں کے لیے ہر ممکن کوشش کا حکم جاری کیا۔