اسلام آباد : وزیراعظم عمران خان نے ذاتی حملوں پر مشتمل مخصوص مہم پر سخت اظہار ناراضی کرتے ہوئے واضح پیغام دیا کہ اتحادی ہمارے ساتھ ہیں کہیں نہیں جارہے۔
تفصیلات کے مطابق وزیراعظم عمران خان کی زیر صدارت سینٹرل ایگزیکٹو کمیٹی اجلاس کی اندرونی کہانی سامنے آگئی ، ذرائع کا کہنا ہے کہ اجلاس میں بلدیاتی انتخابات اور سیاسی حکمت عملی پر غور کیا گیا۔
ذرائع نے کہا کہ وزیراعظم نے بتایا کہ اتحادی ہمارے ساتھ ہیں کہیں نہیں جا رہے اور ہدایت کہ اپوزیشن کے بیانیے کا مقابلہ کارکردگی سے کریں۔
وزیراعظم نے ڈیمز، ہیلتھ کارڈ، احساس اور کامیاب جوان پروگرام پربات کرنےکی ہدایت کرتے ہوئے کہا فلاحی منصوبوں سے متعلق حکومتی اقدامات کو عوامی سطح پر اجاگر کریں۔
ذرائع کے مطابق وزیراعظم نے ذاتی حملوں پر مشتمل مخصوص مہم پر سخت اظہار ناراضی کرتے ہوئے کہا ذاتی حملوں پرمشتمل مہم گھٹیا اور نا قابل برداشت ہے، مادر پدر آزادی خطرناک ہے، ایسے رجحان کی حوصلہ شکنی کرنا ہو گی۔
عمران خان کا کہنا تھا کہ بلدیاتی انتخابات کےدوسرے مرحلے میں بہترین نتائج کیلئے کوشش کریں۔
یاد رہے اس سے قبل ایک تقریب سے خطاب میں وزیراعظم عمران خان نے چوہدری برادران پر مکمل اعتماد کا اظہار کرتے ہوئے کہا تھا کہ پی ٹی آئی کی سخت تربیت کی ہے، وہ گھبراتے نہیں۔
ان کا کہنا تھا کہ جو گھبرائے ہوئے ہیں انہیں اب چوہدری شجاعت کی صحت کاخیال آگیا، گھبرائےہوئےلوگ بیس بیس سال پرانی فوتگی کی دعا کیلئے بھی جارہے ہیں۔
