اسلام آباد : وزیر اعظم عمران خان نے شہریوں کی شکایات کے مؤثر حل کیلئے ماہانہ اجلاس بلانے کا حکم دے دیا، وزیر اعظم آفس کا کہنا ہے کہ شکایات سے متعلق شہریوں کی رائے پردوبارہ جانچ پڑتال کی جائے۔
تفصیلات کے مطابق وزیر اعظم عمران خان نے شکایات کے حل سے غیرمطمئن شہریوں کیلئے اہم فیصلہ کرتے ہوئے شہریوں کی شکایات کے مؤثر حل کیلئے ماہانہ اجلاس بلانے کا حکم دے دیا۔
اس حوالے سے وفاقی اداروں، صوبائی چیف سیکریٹریز اور آئی جیز کو مراسلہ جاری کردیا گیا ہے ، مراسلے میں وزیر اعظم آفس نے کہا ہے کہ شکایات،شہریوں کی رائے پر ماہانہ اجلاس بلایا جائے اور شکایات سے متعلق شہریوں کی رائے پردوبارہ جانچ پڑتال کی جائے۔
مراسلے میں کہا گیا ہے کہ پورٹل پر5 لاکھ سے زائد افراد نے شکایات کے ازالے کی تصدیق کی، وزیراعظم کی ہدایات پرشکایت کی دوبارہ جانچ پڑتال کی جائے۔
وزیر اعظم آفس کا کہنا ہے کہ افسران پورٹل پر موصول رائے کا ذمہ داری کیساتھ جائزہ لیں، پہلے مرحلے پر 1لاکھ سے زائد شکایات کی جانچ پڑتال کی گئی ، پورٹل پر مزید 28 فیصد شہریوں نے اطمینان کا اظہار ہے۔
