اسلام آباد : وزیر اعظم عمران خان آج رنگ روڈ منصوبے کا سنگ بنیاد رکھیں گے، منصوبہ بانٹھ موڑ سے ٹھلیاں تک بنایا جائے گا۔
تفصیلات کے مطابق راولپنڈی رنگ روڈ منصوبے کا سنگ بنیاد رکھنے کی افتتاحی تقریب آج مجوزہ ٹھلیاں انٹرچینج کے مقام پر ہوگی ، جس میں وزیراعظم شریک ہوں گے جبکہ وزیراعلیٰ پنجاب اوروفاقی وزرا بھی شرکت کریں گے۔
تقریب میں عمران خان رنگ روڈ منصوبے کا سنگ بنیاد رکھیں گے اور تقریب سے خطاب بھی کریں گے۔
راولپنڈی کی ضلعی انتظامیہ نے انتظامات کو حتمی شکل دے دی ہے ، منصوبہ بانٹھ موڑ سے ٹھلیاں تک بنایا جائے گا اور اس کی کل لمبائی 38.3 کلومیٹر ہوگی۔
منصوبے کے تحت 8ہزار992کنال زمین خریدی جارہی ہے، زمین خریداری پر 6ارب 72کروڑ 47 لاکھ 30ہزار روپے خرچ ہوں گے۔
زمین خریداری کے5ارب 90کروڑ 13لاکھ روپے صوبائی حکومت نے آرڈی اے کو جاری کیئے ہوئے ہیں اور 2ارب 39کروڑ روپے کی زمین خریدی جاچکی ہے۔
زمین خریداری کی مد میں آرڈی اے کے آکاؤنٹ میں 3ارب 51کروڑ 13لاکھ بیلنس میں ہے جبکہ 13کروڑ 86لاکھ 40ہزار روپے سروسز منتقلی پر خرچ ہوں گے۔
منصوبے کے سول ورکس پر 23ارب 60کروڑ 62لاکھ10ہزار روپے لاگت آئے گی، سول ورکس لاگت کی منظوری ایکنک پہلے ہی دے چکا۔
منصوبے کی مجموعی طور پر لاگت 30ارب 60کروڑ 69لاکھ 40ہزار روپے لاگت آئے گی ، رنگ روڈ 6رویہ سڑکوں پر مشتمل ہوگا اور ہر لائن کی چوڑائی 3.65میٹر ہوگی۔
دیگر شاہراؤں سے رابطہ قائم کرنے کے لیے 5انٹر چینج تعمیر کیئے جائیں گے جبکہ انٹرچینج بانٹھ،چک بیلی روڈ،اڈیالہ روڈ،چکری روڈ اور ٹھلیاں کے مقام پر تعمیر ہوں گے۔
