اسلام آباد : وزیراعظم عمران خان آج شنگھائی تعاون تنظیم سربراہی اجلاس میں ویڈیو کانفرنس کے ذریعے شرکت کریں گے، وزیراعظم کواجلاس میں شرکت کی دعوت روسی صدر کی طرف سے دی گئی ہے۔
تفصیلات کے مطابق ترجمان دفتر خارجہ نے اپنے بیان میں کہا ہے کہ شنگھائی تعاون تنظیم (ایس سی او) کے سربراہان کا 20واں اجلاس آج 10 نومبر کو منعقد ہوگا ، اجلاس ویڈیو کانفرنس کے ذریعے منعقدکیا جائے۔
ترجمان کے مطابق وزیراعظم سربراہی اجلاس میں ویڈیو کانفرنس کے ذریعے شرکت کریں گے جبکہ روسی صدر ولادی میر پیوٹن اجلاس کی صدارت کریں گے۔
خیال رہے روسی صدرپیوٹن نے وزیراعظم عمران خان کو شنگھائی تعاون تنظیم سربراہ اجلاس میں شرکت کی دعوت دی تھی جبکہ چینی صدرشی جن پنگ، بھارتی وزیراعظم نریندر مودی بھی اجلاس کا حصہ ہوں گے۔
مزید پڑھیں : روسی صدرکی وزیراعظم کو شنگھائی تعاون تنظیم سربراہ اجلاس میں شرکت کی دعوت
ذرائع کے مطابق کورونا کی دوسری لہرکے باعث اجلاس ورچوئل انداز میں منعقد ہوگا، کورونا، افغان مسئلے سمیت اہم تنازعات اور دہشت گردی اجلاس کے اہم موضوعات ہوں گے جبکہ انسانی و منشیات اسمگلنگ،منظم وسائبرجرائم پربھی گفتگوہوگی۔
ذرائع کا کہنا تھا کہ 4 مبصرممالک افغانستان،بیلاروس،ایران،منگولیا بھی شرکت کریں گے جبکہ تنظیم کے مذاکراتی شراکت دارممالک آرمینیا،آذربائیجان ، کمبوڈیا،نیپال،سری لنکا،ترکی کی بھی شرکت متوقع ہے۔
