اسلام آباد: وزیر اعظم عمران خان کا کہنا ہے کہ پاکستان میں نومبر میں برآمدات میں 8.3 اور دسمبر میں 18.3 فیصد اضافہ ہوا، برآمد کنندگان اور وزارت تجارت کو کامیابی پر مبارکباد پیش کرتا ہوں۔
تفصیلات کے مطابق وزیر اعظم عمران خان نے سماجی رابطے کی ویب سائٹ ٹویٹر پر ٹویٹ کرتے ہوئے کہا کہ خطے میں برآمدی رجحان کے بارے میں اعداد و شمار موصول ہوئے، نومبر دسمبر میں پاکستان کی نسبت بھارت، بنگلہ دیش کی برآمدات منفی رہیں۔
وزیر اعظم کا کہنا تھا کہ برآمد کنندگان اور وزارت تجارت کو کامیابی پر مبارکباد پیش کرتا ہوں۔
انہوں نے کہا کہ پاکستان میں نومبر میں برآمدات میں 8.3 اور دسمبر میں 18.3 فیصد اضافہ ہوا، نومبر 2020 میں بھارت کی برآمدات 9 فیصد سے زیادہ گریں جبکہ بنگلہ دیش دسمبر 2020 میں برآمدات میں 6 فیصد سے زائد کمی ہوئی۔
I have received the regional export trends and this shows that, compared to our exports, the exports of India and Bangladesh for Nov/Dec 2020 showed negative growth. I wish once again to congratulate the exporters and the Ministry of Commerce for this achievement. pic.twitter.com/lpmZa6MOl5
— Imran Khan (@ImranKhanPTI) January 7, 2021
یاد رہے کہ دو روز قبل اسٹیٹ بینک کی جاری کردہ رپورٹ کے مطابق مالی سال 2021 میں پاکستان کی معیشت کرونا وائرس سے پہلے کی راہ پر دوبارہ گامزن ہوئی، پاکستان کی برآمدی کارکردگی متعدد دیگر ابھرتی معیشتوں کے مقابلے میں بہتر رہی۔
رپورٹ کے مطابق برآمدات نے اپنی کرونا سے پہلے ستمبر کی سطح کو چھو لیا، ٹیکسٹائل، سیمنٹ اور دوا سازی کی بلند برآمدی وصولیوں سے مدد ملی۔
اسٹیٹ بینک کا کہنا تھا کہ ملک کے زرمبادلہ کے ذخائر میں مزید اضافہ ہوا، کرونا سے نمٹنے کی ری فنانس سہولت کی رقم بڑھ کر 8.4 ارب روپے تک پہنچ گئی۔
