The news is by your side.

Advertisement

وزیراعظم کی صوبائی بجٹ کی تیاری میں کفایت شعاری اپنانے کی ہدایت

اسلام آباد : وزیراعظم عمران خان نے معاشی صورتحال کے پیش نظر صوبائی بجٹ کی تیاری میں کفایت شعاری اپنانے کی ہدایت کرتے ہوئے کہا بجٹ کی تیاری میں ہر شعبے میں کفایت شعاری کو یقینی بنایا جائے۔

تفصیلات کے مطابق وزیراعظم عمران خان کی زیر صدارت اجلاس ہوا، جس میں پنجاب کے آئندہ مالی سال کیلئےبجٹ تجاویز پر تبادلہ خیال کیاگیا، اجلاس میں وزیر اعلیٰ پنجاب عثمان بزدار اور گورنر اسٹیٹ بینک کی شرکت کی جبکہ چیئرمین ایف بی آر،وفاقی وزیرمنصوبہ بندی ، مشیر تجارت، وزیرخزانہ پنجاب  ہاشم جواں بخت، چیف سیکریٹری، سیکرٹری خزانہ پنجاب بھی شریک تھے۔

اجلاس میں وزیراعظم عمران خان کو صوبائی بجٹ کے حجم اور ممکنہ اہداف پر بریفنگ دی گئی ، بریفنگ میں کہا گیا صوبائی بجٹ پی ٹی آئی منشورکے تحت  بنایا جا رہا ہے، بجٹ میں انسانی، سماجی ترقی کے لئے رقم مختص کی جا رہی ہے۔

بریفنگ میں بتایا گیا بجٹ تیاری میں زراعت،صنعتی ترقی پربھی خصوصی توجہ دی گئی ، ترقیاتی منصوبوں میں پبلک پرائیویٹ شراکت داری کوفروغ دیا جائے  گا۔

وزیراعظم عمران خان نے معاشی صورتحال کے پیش نظر کفایت شعاری اپنانے کی ہدایت کرتے ہوئے کہا بجٹ کی تیاری میں ہر شعبے میں کفایت شعاری کو یقینی بنایا جائے اور اس سلسلے میں اعلیٰ سطح پر مثالی اقدامات کئے جائیں۔

مزید پڑھیں : وزیراعظم کی معاشی ٹیم کو عوام دوست اور معاشی استحکام کے پیش نظر   بجٹ بنانے کی ہدایت

یاد رہے گذشتہ روز وزیراعظم عمران خان سے مشیر خزانہ حفیظ شیخ اور گورنر اسٹیٹ بینک رضا باقر کی ملاقات ہوئی تھی ، جس میں دونوں نے آئندہ مالی سال کے لیے پیش کیے جانے والے متوقع بجٹ سے متعلق تجاویز پیش کیں۔

وزیراعظم نے معاشی ٹیم کو عوام دوست اور معاشی استحکام کے پیش نظر   بجٹ بنانے کی ہدایت کی تھی۔

خیال رہے کہ وزیر اعظم ہدایت کر چکے ہیں کہ بجٹ میں اخراجات میں ممکنہ حدتک کفایت شعاری اختیار کی جائے۔

Comments

comments

یہ بھی پڑھیں