The news is by your side.

Advertisement

وزیر اعظم عمران خان 2 روزہ دورے پر سعودی عرب پہنچ گئے

جدہ: وزیر اعظم عمران خان 2 روزہ دورے پر سعودی عرب پہنچ گئے، دورے کے دوران وزیر اعظم سعودی قیادت سے اہم ملاقاتیں کریں گے۔

تفصیلات کے مطابق وزیر اعظم عمران خان 2 روزہ دورے پر سعودی عرب پہنچ گئے۔ وزیر خارجہ شاہ محمود قریشی اور معاون خصوصی زلفی بخاری سمیت دیگر حکام بھی وزیر اعطم کے ہمراہ ہیں۔

گورنر مکہ خالد بن الفیصل اور پاکستانی سفیر راجہ اعجاز نے وزیر اعظم عمران خان کا استقبال کیا۔

اپنے دورے کے دوران وزیر اعظم عمران خان سعودی قیادت سے مقبوضہ کشمیر کی بگڑتی صورتحال اور بھارت کی جانب سے 5 اگست کے غیر آئینی اقدامات پر تبادلہ خیال کریں گے، وہ کچھ عرصے سے مسئلہ کشمیر پر سعودی ولی عہد محمد بن سلمان سے مسلسل رابطے میں رہے ہیں۔

دورے کے دوران سعودی قیادت سے اہم ملاقاتوں کے دوران وزیر اعظم خطے کی سلامتی اور مختلف شعبوں میں تعاون پر بھی تبادلہ خیال کریں گے۔ وزیر اعظم 30 رکنی پاکستانی کمیٹی کے وفد سے بھی ملاقات کریں گے۔

مزید پڑھیں: پاکستان نے 12 ارب ڈالرز کا امدادی پیکج حاصل کرلیا

وزیر اعظم آفس کا کہنا ہے کہ سعودی عرب اور پاکستان کے درمیان اقتصادی شراکت داری کو مزید مستحکم کرنے پر تبادلہ خیال ہوگا، دونوں ممالک کے تعلقات میں گرم جوشی اور باہمی اعتماد کی فضا ہے۔

وزیر اعظم کے دورے سے دونوں ممالک کے برادرانہ تعلقات کو مزید تقویت ملے گی اور مختلف شعبوں میں دو طرفہ تعاون کو مزید وسعت دی جائے گی۔

بعد ازاں عمران خان سعودی عرب سے ہی اقوام متحدہ کی جنرل اسمبلی کے اجلاس میں شرکت کے لیے امریکا روانہ ہوں گے جہاں وہ مظلوم کشمیریوں کی آواز بنیں گے اور بھارتی جارحیت دنیا کے سامنے بے نقاب کریں گے۔

ذرائع کے مطابق وزیر اعظم کا دورہ خطے کی موجودہ صورتحال کے پیش نظر انتہائی اہم ہوگا۔

Comments

comments

یہ بھی پڑھیں