دوحہ: نیول چیف ایڈمرل ظفر محمود عباسی سرکاری دورے پر قطر پہنچے جہاں انہوں نے قطری وزیراعظم شیخ عبداللہ بن نصیر سے خصوصی ملاقات کی۔
تفصیلات کے مطابق ترجمان پاک بحریہ کا کہنا ہے کہ امیرالبحر ایڈمرل ظفر محمود عباسی کا قطر میں نیول بیس پہنچنے پر کمانڈر قطر امیری نیول فورسز نے پرتپاک استقبال کیا اور امیرالبحر کو چاک وچوبند دستے نے روایتی گارڈآف آنرپیش کیا۔
ترجمان کے مطابق نیول چیف نے قطری وزیر اعظم شیخ عبداللہ بن نصیر سے خصوصی ملاقات کی اس دوران باہمی دلچسپی کے امور اور دوطرفہ بحری تعاون پر تبادلہ خیال کیا گیا۔ امیرالبحر نے قطری چیف آف اسٹاف سمیت کمانڈر قطر امیری نیول فورسز سے بھی ملاقات کی۔
ترجمان پاک بحریہ نے بتایا کہ اہم عہدیداروں سے ملاقاتوں میں باہمی دلچسپی کے امور، تعلقات کے فروغ اور دو طرفہ بحری تعاون پر گفتگو ہوئی، نیول چیف نے سمندری تحفظ اور امن کے لیے پاک بحریہ کے عزم کو اجاگر کیا۔
نیول چیف نے قطر کی مختلف بحری تنصیبات سمیت میری ٹائم وارفیئراینڈٹریننگ سینٹر کا بھی دورہ کیا، امیرالبحر نے دورے کے دوران مسئلہ کشمیر پر پاکستان کے مؤقف کو بھی اجاگر کیا۔
نیول چیف ایڈمرل ظفر محمود عباسی کا متحدہ عرب امارات کا دورہ
ایڈمرل ظفر محمود عباسی کا دورہ دونوں ممالک بالخصوص بحری افواج کے تعلقات کو فروغ دے گا۔
یاد رہے کہ رواں سال جولائی میں پاک بحریہ کے سربراہ ایڈمرل ظفر محمود عباسی نے متحدہ عرب امارات کا دورہ کیا تھا، دورے کے دوران وہ نیول فورسز یونٹ اورگن ٹاؤٹ نیول بیس بھی گئے تھے، انہوں نے اہم عہدیداروں سے ملاقاتیں بھی کی تھیں۔
