The news is by your side.

Advertisement

وزیر اعظم کی بلوچستان ترقیاتی پیکج پر تیزی سے کام کرنے کی ہدایت

اسلام آباد: وزیر اعظم عمران خان نے بلوچستان ترقیاتی پیکج پر تیزی سے کام کرنے کی ہدایت دیتے ہوئے کہا ہے کہ بلوچستان کے لوگوں کی زندگیاں بہتر بنانے کے لیے حل تلاش کرنا ہوں گے۔

تفصیلات کے مطابق وزیر اعظم عمران خان کی زیر صدارت جنوبی بلوچستان ترقیاتی پیکج کا جائزہ اجلاس ہوا، اجلاس میں ترقیاتی منصوبوں کی سست رفتاری پر تشویش کا اظہار کیا گیا۔

وزیر اعظم نے وزیر اعلیٰ بلوچستان کی زیر صدارت ایپکس کمیٹی کا اجلاس نہ ہونے پر بھی اظہار تشویش کیا۔ وزیر اعظم کو بریفنگ دی گئی کہ ایک سال کے دوران ایپکس کمیٹی کا صرف ایک اجلاس ہوا۔

بریفنگ میں بتایا گیا کہ بلوچستان وسائل سے مالا مال صوبہ ہے، ملک میں مقامی طور پر پیدا گیس کا 40 فیصد بلوچستان سے حاصل ہوتا ہے۔

وزیر اعظم عمران خان نے 200 ارب کے منصوبوں پر تیزی سے کام کرنے کی ہدایت کرتے ہوئے کہا کہ بلوچستان میں منصوبوں کے جائزے پر ہر ماہ اجلاس کی صدارت کروں گا، بلوچستان میں بکھری آبادی کے باعث مسائل دیگر ملک سے مختلف ہیں۔

انہوں نے کہا کہ بلوچستان کے لوگوں کی زندگیاں بہتر بنانے کے لیے حل تلاش کرنا ہوں گے۔

وزیر اعظم نے ایپکس کمیٹی کا ماہانہ اور ایگزیکیوشن کمیٹی کا اجلاس ہر 15 دن بعد بلانے کی ہدایت کی جبکہ تربت ایئرپورٹ کو بھی جلد از جلد مکمل کرنے کی ہدایت دی۔

انہوں نے گودار اور تربت میں زیر تعمیر نرسنگ کالجز پر کام تیز کرنے کی تاکید کرتے ہوئے وزارت منصوبہ بندی، توانائی، سمندری امور اور حکومت بلوچستان کو پیکج پر تیزی سے کام کی ہدایت دی۔

Comments

یہ بھی پڑھیں