اسلام آباد: وزیراعظم شہباز شریف نے عالمی یوم القدس کے موقع پر نہتے فلسطینی بہن بھائیوں کے ساتھ اظہاریکجہتی کرتے ہوئے کہا عالمی برادری سے ظلم وجبر روکنے کیلئے اسرائیل پر دباؤ ڈالے۔
تفصیلات کےمطابق آج دنیا بھر میں یوم قدس منایا جارہا ہے، وزیراعظم شہبازشریف نے عالمی یوم القدس اورجمعة الوداع کےموقع پر پیغام میں کہا کہ پوری قوم صیہونی جارحیت اور ظلم و جبرکی مذمت کرتی ہے، نہتے فلسطینی بہن بھائیوں کےساتھ اظہاریکجہتی کرتےہیں۔
شہباز شریف کا کہنا تھا کہ اسرائیل7دہائیوں سےفلسطین اور بیت المقدس پرغیرقانونی قابض ہے، اسرائیل بین الاقوامی قوانین کی مسلسل خلاف ورزی کررہاہے اور اسرائیلی مظالم پرعالمی برادری خاموش تماشائی کا کرداراداکررہی ہے۔
وزیراعظم نے کہا کہ اسرائیل گزشتہ برس اکتوبرسے فلسطینیوں پر ظلم و جبر کے پہاڑ توڑ رہا ہے، 17ہزار بچوں سمیت 32ہزار فلسطینی شہید،70ہزارزخمی ہوچکے ہیں، اسپتالوں،پناہ گزین کیمپوں،اسکولوں کودانستہ طور پر نشانہ بنایاگیا، فلسطینیوں تک امدادی اشیا کی رسائی کو روکاگیا۔
ان کا کہنا تھا کہ سلامتی کونسل کی جنگ بندی کی قراردادکےباوجودبمباری جاری ہے، عالمی برادری ظلم وجبر روکنے کیلئے اسرائیل پر دباؤ ڈالے۔
شہباز شریف نے کہا کہ پاکستان 1967 سے پہلے کی آزادفلسطینی ریاست کی حمایت جاری رکھے گا، پاکستان فلسطینی بہن بھائیوں کی اخلاقی و سفارتی حمایت جاری رکھے گا، مسلم امہ ماہ رمضان میں فلسطینی،کشمیریوں بھائیوں کودعاؤں میں یاد رکھے اور قوم جمعة الوداع کے موقع پرپاکستان میں امن،ترقی وخوشحالی کیلئے دعا کرے۔