The news is by your side.

Advertisement

وزیر اعظم شاہد خاقان کی مہاتیر محمد کو ملائشیا کا وزیر اعظم بننے پر مبارک باد

اسلام آباد: وزیر اعظم شاہد خاقان عباسی نے ملائشیا کے نو منتخب وزیر اعظم مہاتیر محمد کو فون کرکے چودھویں عام انتخابات میں جیتنے اور وزیر اعظم بننے پر مبارک باد دی۔

تفصیلات کے مطابق وزیر اعظم پاکستان نے ملائشیا کے سب سے معمر نو منتخب وزیر اعظم کے ساتھ گفتگو میں دوطرفہ اعلیٰ سطحی روابط اور پارلیمانی وفود کے تبادلے کی ضرورت پر زور دیا، اور ان کو دورۂ پاکستان کی دعوت بھی دی۔

ڈاکٹر مہاتیر محمد نے فون کرنے پر وزیر اعظم شاہد خاقان کا شکریہ ادا کرتے ہوئے کہا کہ دو طرفہ تعلقات کو مزید مستحکم بنانا ضروری ہیں، اس کے لیے کام کیا جائے گا۔

وزیر اعظم شاہد خاقان نے اپنے ملائیشائی ہم منصب مہاتیر بن محمد کے ساتھ مسئلہ کشمیراورفلسطین سمیت مسلمانوں کو درپیش مسائل پر بھی بات چیت کی۔

وزیر اعظم نے فون پر ملائشیا میں انتخابات کے پرامن انعقاد اور طاقت کی پرامن منتقلی کو سراہتے ہوئے کہا کہ اس سے ملائشیائی قوم کی ذہنی بلوغت کی عکاسی ہوتی ہے۔

وزیر اعظم شاہد خاقان عباسی کا غزہ میں قتل وغارت کی شفاف تحقیقات کا مطالبہ


واضح رہے کہ جدید ملائشیا کے بانی، دو دہائیوں سے زائد عرصہ مسلسل وزیراعظم رہنے والے مرد آہن ڈاکٹر مہاتیر محمد سیاست سے چند سال کنارہ کش رہنے کے بعد اپنی تاریخی غلطی سدھارنے انتخابی میدان میں واپس آئے اور کبھی بھی انتخابی مہم میں ناکامی نہ دیکھنے کا ریکارڈ برقرار رکھا۔

خیال رہے ملائیشیا پر 1981 سے 2003 تک آہنی گرفت کے ساتھ حکمرانی کرنے کے بعد بھی مہاتیر محمد نے ملکی سیاست میں ہمیشہ کنگ میکر کا کردار ادا کیا، اور اپنے ہی لائے وزیراعظم نجیب رزاق کو 92 سال کی عمر میں حکومت سے محروم کرکے ان کے بقول انہوں نے اپنی تاریخی غلطی کا ازالہ کردیا ہے۔


خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

Comments

comments

یہ بھی پڑھیں