The news is by your side.

دنیا کی کوئی طاقت پاک ترکیہ کے تعلقات کمزور نہیں کر سکتی، وزیر اعظم

وزیر اعظم شہباز شریف کا کہنا ہے کہ دنیا کی کوئی بھی طاقت پاکستان اور ترکیہ کے تعلقات کو کمزور نہیں کر سکتی، دونوں ممالک مل کر ترقی کا سفر جاری رکھیں گے۔

استنبول شپ یارڈ پر پی این ایس خیبر کی لانچنگ تقریب سے خطاب میں وزیر اعظم شہباز شریف نے کہا کہ پاکستان اور ترکیہ کے درمیان گہرے تاریخی تعلقات ہیں، ترکیہ نے ہر عالمی فورم اور مشکل وقت میں پاکستان کا بھرپور ساتھ دیا، صدر رجب طیب اردوان دور اندیش راہنما ہیں، ان کی قیادت میں ترکیہ جدید فلاحی ریاست بن چکا۔

شہباز شریف نے کہا: ’آج دنیا کو متعدد تنازعات کا سامنا ہے۔ پاکستان کو بھی توانائی کی قلت کا سامنا ہے۔ ہم قابلِ تجدید اور سستے توانائی ذرائع کے لیے اقدامات اٹھا رہے ہیں۔ دونوں ممالک کو قابلِ تجدید توانائی کے حصول کے لیے مل کر کام کرنا ہوگا۔‘

انہوں نے کہا کہ پاکستان اور ترکیہ ماحولیاتی آلودگی میں کمی کے لیے مل کر کام کر سکتے ہیں، دونوں ممالک کو اپنے تجارتی تعلقات کو مزید فروغ دینا ہوگا۔

ان کا کہنا تھا کہ پاکستان کو حالیہ دنوں تاریخ کے بدترین سیلاب کا سامنا کرنا پڑا، ایسے میں ترکیہ نے متاثرین کی بڑھ چڑھ کر مدد کی، متاثرین کے لیے امدادی سامان کی 30 ٹرینیں بھیجیں اور 15 طیارے ترکیہ سے امداد لے کر پہنچے۔

Comments

یہ بھی پڑھیں