اسلام آباد : وزیراعظم شہبازشریف نے وفاقی کابینہ کااہم اجلاس آج طلب کرلیا ، اجلاس میں سپریم کورٹ کے فیصلوں سے پیدا شدہ صورتحال پر غور ہوگا۔
تفصیلات کے مطابق وزیراعظم شہبازشریف کی زیر صدارت وفاقی کابینہ کا اہم اجلاس آج دوپہرایک بجےوزیراعظم ہاؤس میں ہوگا۔
ذرائع کا کہنا ہے کہ اجلاس میں وفاقی کابینہ ملک کی سیاسی صورتحال اورسپریم کورٹ کے فیصلوں سے پیدا شدہ صورتحال پر غور کرے گی۔
اجلاس میں پارلیمنٹ کی بالادستی کو یقینی بنانے کے لیے مختلف آپشنز اور آئندہ کی حکمت عملی پر مشاورت کی جائے گا۔
یاد رہے گذشتہ روز پنجاب اور خیبر پختونخوا میں انتخابات کے لیے فنڈز فراہمی کیس کی سپریم کورٹ ان چیمبر سماعت ہوئی تھی ،جس میں عدالت عظمیٰ نے فنڈز جاری نہ کرنے پر حکومت پر برہمی کا اظہار کیا۔
سپریم کورٹ نے اسٹیٹ بینک کو انتخابات کے لیے فنڈز جاری کرنے کا حکم دیتے ہوئے کہا کہ 21 ارب روپے کے فنڈز الیکشن کمیشن کو جاری کیے جائیں۔
