The news is by your side.

Advertisement

کرائم منسٹر جان لیں لُوٹا ہوا پیسہ واپس کیے بغیر نجات نہیں ملے گی، فرخ حبیب

اسلام آباد : پاکستان تحریک انصاف کے رہنما اور سابق وزیر فرخ حبیب نے کہا ہے کہ کرائم منسٹرجان لیں قوم کا لوٹا گیا پیسہ واپس کیے بغیر نجات کی راہ ممکن نہیں۔

وزیر اعظم شہباز شریف کے حالیہ خطاب پر ردعمل دیتے ہوئے ان کا کہنا تھا کہ مکاری، طوطاچشمی کا انسانی نمونہ بنے کرائم منسٹر قوم کے سامنے کھڑے ہیں، گرینڈ ڈائیلاگ کا شوشہ ناکامی اور پھیلائی گئی معاشی تباہی کا اعتراف ہے۔

انہوں نے کہا کہ بیرونی سازش سے مسلط ہونے کے بعد یہ شخص معیشت کا جنازہ نکال چکا، تیل، بجلی، گیس مہنگا کرکے کرائم منسٹر معیشت کے مضحکہ خیز دعوے کررہے ہیں۔

فرخ حبیب نے کہا کہ لوگوں کی قوت خرید تباہ کرکے2ہزار روپے کے لالی پاپ کا اعلان شرمناک ہے، کرائم منسٹر ڈائیلاگ جیسے شوشے کی بجائے بغیر تیاری مسلط ہونے پر معافی مانگتے۔

پی ٹی آئی رہنما کا کہنا تھا کہ ان کے گرینڈ ڈائیلاگ کے بینیفیشری صحت، معیشت نہیں مقصود چپڑاسی ہیں، کسی ڈائیلاگ کیلئے نہیں بیرونی ایجنڈے کی تکمیل کیلئے کٹھ پتلی کو بٹھایا گیا۔

انہوں نے کہا کہ عوام کو کچلنا کرائم منسٹر کو سونپے جانے والے ایجنڈے کا حصہ ہے، نیب اور ایف آئی اے کو چوروں کے نگہبان بنانا مکروہ ایجنڈے کا اگلا حصہ ہے۔

سابق وزیر نے کہا کہ انتخاب پر ڈاکہ ڈالنا، اوورسیز پاکستانیوں کو سیاسی عمل سے دور رکھنا ان کا اصل ہدف ہے، مخالفین کیخلاف بدترین ریاست گردی بھی ان کے ایجنڈے میں شامل ہے۔

انہوں نے کہا کہ آج یہ امپورٹڈ بندوبست براہ راست ملکی وقومی سلامتی کیلئے خطرہ ہے، ناکام تجربے کی مزید سزا قوم کو دینے کی بجائےاصلاح احوال کی فکر کی جائے۔

فرخ حبیب کا مزید کہنا تھا کہ کٹھ پتلیوں کا قابل نفرت تماشا بند کرکے انتخابات کی جانب جایا جائے، کرائم منسٹرجان لیں قوم کا لوٹا گیا پیسہ واپس کیے بغیر نجات کی راہ ممکن نہیں۔

Comments

یہ بھی پڑھیں