اسلام آباد: وزیر اعظم شہباز شریف نے عوام سے سیلاب متاثرین کی مدد کی اپیل کردی، وزیر اعظم کا کہنا ہے کہ سیلاب زدگان کے لیے 80 ارب روپے سے زائد کی رقم درکار ہے۔
تفصیلات کے مطابق وزیر اعظم شہباز شریف نے سیلاب متاثرین کے لیے مدد کی اپیل کردی۔
وزیر اعظم کا کہنا تھا کہ ملک میں بارشوں کا 30 سال کا ریکارڈ ٹوٹنے سے تباہی ہوئی ہے، بلوچستان اور سندھ میں تباہی و بربادی سے قیامت صغریٰ کا منظر ہے، سینکڑوں پاکستانی اپنے پیچھے جدائی کا غم چھوڑ گئے ہیں۔
انہوں نے کہا کہ سیلاب کی وجہ سے بہت بڑی تعداد میں لوگ بے گھر ہیں، مال مویشی، فصلوں، باغات اور املاک کو نقصان پہنچا ہے، صوبائی حکومتیں، مسلح افواج کے تعاون سے مل کر دن رات کام کر رہی ہیں۔
وزیر اعظم کا کہنا تھا کہ مجموعی طور پر 37.2 ارب روپے سیلاب زدگان کے لیے مہیا کیے جا رہے ہیں، فی الفور 5 ارب روپے کی رقم این ڈی ایم اے کو جاری کروائی گئی ہے۔ ہر جاں بحق شخص کے خاندان کو 10 لاکھ روپے کی ادائیگی جاری ہے، دیگر متاثرین کو 25 ہزار روپے نقد کی ادائیگی بڑے پیمانے پر جاری ہے۔
انہوں نے کہا کہ امداد کے لیے 80 ارب روپے سے زائد درکار ہیں، نقصانات کو پورا کرنے اور متاثرین کی بحالی کے لیے کھربوں روپے کی ضرورت ہے۔ سڑکیں اور پل بہہ جانے سے زمینی رابطہ کٹنے پر ہیلی کاپٹروں سے مدد لی جارہی ہے۔
وزیر اعظم کا کہنا تھا کہ 2005 کے زلزلے اور 2010 کے سیلاب میں عوام ایسے ہی عظیم جذبے سے مثال بن گئے تھے، پوری قوم آگے بڑھ کر ہاتھ بٹائے تو ہم کئی گنا زیادہ رفتار سے کامیاب ہوسکتے ہیں۔
انہوں نے کہا کہ میں آپ سے تعاون کی درخواست کرتا ہوں، سیلاب زدگان کی مدد کے لیے قائم فنڈ میں دل کھول کر عطیات جمع کروائیں، آئیں، مصیبت زدہ بھائیوں کی انصار مدینہ کی طرح مدد کریں۔
