اسلام آباد: وزیر اعظم شہباز شریف اگلے ماہ برطانیہ کا دورہ کردیں گے جہاں وہ برطانوی بادشاہ چارلس کی تاج پوشی کی تقریب میں شرکت کریں گے۔
تفصیلات کے مطابق وزیر اعظم شہباز شریف کا آئندہ ماہ مئی کے پہلے ہفتے میں دورہ برطانیہ کا قوی امکان ہے، وزیر اعظم برطانوی بادشاہ چارلس کی تاج پوشی کی تقریب میں شرکت کریں گے۔
ذرائع کا کہنا ہے کہ وزیر اعظم کے ہمراہ کابینہ ارکان بھی برطانیہ جائیں گے۔
برطانوی بادشاہ چارلس سوئم اور ملکہ کمیلا پارکر کی تاج پوشی کی تقریب 6 مئی کو منعقد ہوگی جس میں وزیر اعظم شہباز شریف دیگر مہمانوں کے ہمراہ بکھنگم پیلس، ویسٹ منسٹر ایبے میں ہونے والی تقریب میں شریک ہوں گے۔
ذرائع کا کہنا ہے کہ وزیر اعظم کے دورہ برطانیہ کے دوران برطانوی وزیر اعظم رشی سونک سے ملاقات کا شیڈول بھی طے کیا جا رہا ہے۔
شہباز شریف، پارٹی سربراہ نواز شریف سے بھی ملاقات کریں گے، ملاقات میں ملکی سیاسی صورتحال، آئندہ عام انتخابات اور دیگر امور پر گفتگو ہوگی۔
