کراچی:وزیراعظم عمران خان نے گورنر سندھ عمران اسماعیل کو کراچی میں جاری وفاق کے ترقیاتی منصوبوں کو جلد مکمل کرنے کی ہدایت کر دی۔
تفصیلات کے مطابق گورنر ہاؤس کراچی میں وزیراعظم عمران خان سے گورنر سندھ عمران نے ملاقات کی جس میں سندھ کی سیاسی صورت حال سمیت کرونا کے تناظر میں صوبے کی مجموعی صورت حال پر تبادلہ خیال کیا گیا۔
ملاقات کے دوران وفاقی حکومت کی جانب سے جاری ترقیاتی منصوبوں پر غور کیا گیا۔اس موقع پر وزیراعظم عمران خان نےگورنر سندھ عمران اسماعیل کو کراچی میں جاری وفاق کے ترقیاتی منصوبوں کو جلد مکمل کرنے کی ہدایت بھی کی۔
وزیر اعظم دو روزہ دورے پر کراچی پہنچ گئے
اس سے قبل وزیراعظم عمران سندھ کے دو روزہ دورے پر کراچی پہنچے۔ایئرپورٹ پر گورنر سندھ عمران اسماعیل نے وزیراعظم کا استقبال کیا۔ وزیراعلیٰ سندھ وزیراعظم کے استقبال کے لیے ایئرپورٹ پر نہیں آئے۔
وزیراعظم آج رات کراچی میں قیام کریں گے اور کل دوپہر لاڑکانہ جائیں گے جہاں وہ احساس سینٹر کا دورہ کریں گے۔دورے کے دوران وزیراعظم لاڑکانہ میں پی ٹی آئی کی صوبائی قیادت سے بھی ملاقات کریں گے۔
یاد رہے کہ 12 جون کو وزیر اعظم نے لاہور کا بھی دو روزہ دورہ کیا تھا، انہوں نے گورنر پنجاب چوہدری محمد سرور اور وزیر اعلیٰ عثمان بزدار سے ملاقاتیں کی تھیں۔
