چھاچھرو: وزیراعظم عمران خان آج تھرپارکر کا دورہ کریں گے، وزیراعظم کی آمد کے سلسلے میں کھلاڑیوں نے پنڈال سجالیا۔
تفصیلات کے مطابق وزیراعظم عمران خان اور وزیرخارجہ شاہ محمود قریشی سمیت دیگر قائدین تھرپارکر پہنچیں گے، کھلاڑیوں نے جلسے کا پنڈال تیار کرلیا۔
تھرپارکر دورے کے موقع پر وزیر اعظم جلسے سے خطاب اور صحت کارڈ تقسیم کریں گے، جلسے کی تیاریوں کے سلسلے میں حلیم عادل شیخ چھاچھرو پہنچ گئے۔
حلیم عادل شیخ کراچی سے ویلکم عمران خان ریلی کی قیادت کرتے ہوئے جلسہ گاہ پہنچے، حلیم عادل شیخ، ایم این اے جے پرکاش آکرانی و دیگر قائدین نے بھی پنڈال کا دورہ کیا۔
اس حوالے سے ذرائع کا کہنا تھا کہ وزیراعظم عمران خان تھر کے دورے کے دوران تھرکول میگا منصوبے کا جائزہ لیں گے اور تھر پارکر کے لئے خصوصی پیکج کا اعلان بھی کریں گے۔
ذرائع کے مطابق سابق وزیر اعلیٰ سندھ سردار ارباب غلام رحیم بھی وزیراعظم عمران خان سے ملاقات کریں گے، ارباب غلام رحیم کی اپنے ساتھیوں کے ہمراہ پی ٹی آئی میں شمولیت متوقع ہے۔
وزیر اعظم عمران خان کی آمد سے قبل رکن قومی اسمبلی لال مالھی اور دیگر رہنماؤں نے چھاچھرو پہنچ کر جلسہ گاہ اور دیگر انتظامات کا جائزہ لیا ہے۔
